حجيتكم ما جيتكم//على لالاَّ محجوبة
مولاة لوشام// ولخالة ف لخد
الزين ولبياض// ولحناني ف ليد
حاجبة ما تخرج//من دارها ما تدرج
حاجتها مقضية //ف اللحظة ولحين
من عند زين سمية//فْرمشتو عين
مولاي فلان//حاكمها حكام زمان
فين وفين باش//لالاّ محجوبة تبان
ما تشوف خيال//ماتمشي لحمام
ماتكلس مع نسوان//ما توصل ارحام
لالا محجوبة هانية//مرتاحة وعاجبها لحال
ما تخمم ما تضرب حساب//دايتها غير فْ لعيال
عايشة كيف بغى مولاي//خاطيها شوار والراي
عاشت سنين مع فلان//كبرت لخيمة ودارت الصبيان
دازت سنين ويام
مات مولاي فلان//خلا موراه لفواه
تفكدت لالا محجوبة//حالها ومحتالها
لامن يوريها //ولامن يعينها
تبكي وتنوح عل السي فلان//وعلى حيرتها مزيان
حصلت حصلة كبيرة//لاتفكير زين ولا تدبيرة
لالاَّ محجوبة// عرفت بحق الزمان
من بعد ما فات لفوت // وخذا لموت السي فلان
هاذي وصية// لمحجوبة واخوتتها
لحجبة زينة// وتغنديفة خيبة
هذا زمان التشميرة//لمراة خصها لفياقة
الاصل ولعرض مصون// مع لحداكة بلا عياقة
هكذا بغى زمان //يد الراجل ف يد لمراة
يتغلبو عل لعشرة// ويحليو لحاجة لمُرة
س/أ/غ 29/10/2012