سمعلي يا راسـي نقـول...وحبسلي من ديك الغفلة
مالك قاطع الواد بالطول ...مالك بلعمر ديالي تتـفلّ
الحكمه تخرج من سكات ...وكترت لكـلام هـبال
قالـها القوم لـي فـات...ناس الحكمـه ولمـتال
الصوت لحنين ياحلـيلو...ومول لغـوات يـندب
لكـلام الغالب ستـيلو ...والكـلب النبّاح يـهرب
النيّـه ديـمـا تغلـب...خاصها شويّه دالصـبر
مول المعقول ينحـب ...ومـول لغـدر يخسـر
الحشمه تزيّن مولاهـا...وقليـل لحيـه مدمـوم
البسمه بالمعنه محلاها...وكتير الضحكه مهمـوم
الواعي يعرف بالغمزه...دغـيا يقـفز ويديـرها
الغافل خاصّو شي نغزه.ويمـكن يمـكن يفهمها
خلـقنا ربي نعـبدوه...فدنـيا ماتسـوَا دبانّـه
الحق باين نـعرفوه ...وغدرنا ديـك الامـانه
الخطوه المقصوده خير.والـشر فالـتالف رايو
لحلال فيسروكـتير...ولحـرام..لـحرام دّايّو
هدا زين كملو لعقل...وهدا زين خـسرو لهبال
هدا شين بكلامويقتل...وهدا كتير بلعين يقـلال
غدَّ ياودّي يقول كان..واشمن مزيَّه وراك خلّيتِي
يا راسي عامر لحزان.وبراسك راسي ماحسّيتي
الصاله تنقّي مولاها...سبـحانو فيها يــهديك
لعمال تتقاس بقياسها..تخـلّي ديـنك يخـلـيك
عنداك فلوالدين تفرط.شحال صـبرو لهـبالك
قالو لي فرّط يكرّط...ولي درتيـلهوم يندارلك
بالرضى تتقاد الطرقان.والخـير علـيك يكتر
بالسخط تكتر لحزان...تعيا تـجري وتخـسر
لي زعيم دغيا يوصل.الخوّاف كي الفار مخبع
نهار يخرج يحصل...زهرو هكداك لي صكَّع
لي كريم يبقالو خيرو.براكـت مولانـا فـيه
لي بخيل يدّيهلو غيرو.ومتبكـيش الناس عليه
لعزيز عزيز حيت قانع.عفيف ضريف ومقبول
لمدلول لي فغيرو طامع.خفيف سخيف ومهبول
السّاكت يوزن بزّاف...ولهدّار ينقس من قيمتو
لمنوفق يعطي بزعاف.ولكريم يعطي من خيمتو
لعمده على القلب هدي كاينه
لكن لا بد فلوجه تبان
الدخّان من النار هدي باينه
لي متناقد ينافق برهان
القلب لكـبير عـسل...مهـنّي مولاه سعداتو
والقلب المحساد كحل...ينضر مولاه يا خيبتو
نصحتك يا راسي معاني.ماينفع غير المعقول
الغافل فدنيتو يعانـي...وزواق لحياةْ يزول
قالك الأعمال بالنيات
وكل واحد آش نوى
لي هجر بشي خطوات
بها قاصد التقوى
ينالها باللحضات
وكل أجر آش سوى
امّ لي نيْتو بقات
بين الدنيا ولهوى
تبع لي نفسو بغات
جهرا ولّ بالنجوى
يتسمّ هجرتو خسرات
قابض بها لخوى
بعمايلك دايزه لُوقات
وكلها يلقى لي كان نوى...
وقالك النضافة من الإيمان
سعدو لي كانت فوعدو
والحمد لله تعمّر الميزان
وكلها آش كان عندو
وقالك الصدقة برهان
وتخدم عليه من بعدو
والصلى نور يا فلان
وتفقص بْوْقاتها لعدو
ليك ولّ عليك القرآن
وقالك كل الناس يغدو
هالّي عتق نفسو من النيران
هالّي كحال فالنار سعدو...
الرئيسية
موضوع: بيني وبين راسي 
الجمعة 14 ديسمبر - 0:52
