عاق وفاق لمجنون
وخرج من دار غفلون
فرحان مسرور
شاف الدنيا بالف لون ولون
حبو وعشقو بجنون
تعرف عل شلا فنون
عاشها ومارسها
وهومفتون
دار وجال وشاف بعيون
فين كان زمان يكون
كال فْ نفسو
شحال كنت معفون
شحال كنت مغبون
دازت الايام عل لمجنون
عبر بكلام موزون
حْمد الله وهوممنون
عل نعمة لعقل
وارغب الله ما تزول
دخل لمجنون فَ لمعقول
فهم الدنيا يوم عل يوم
وعرف هم بنادم لمدفون
اللي ديما عايش مكبول
وخا هو حي راه مقتول
معدوم
مسموم
مهموم
مقلوب
مسلوب
منكوب
تالم لهاذ لحال لمجنون
سالت دموعو مَ لجفون
تكلم بكلام مقبول
وكلو معقول
بنادم عليه مشغول
حيت شبع مَ لقيل ولقول
قلب عل لحلول
صوتو غير مسموع
آش دار لمجنون؟
تمنى لو كان بقى مهبول
عل الناس معزول
فْ هم الدنيا
ما يعرف ما يقول
رفع كفوفو
وبْْ صوتْ لمغبون
تمتم بكلام محزون
يارب انعم عليا بَ لجنون