منتديات دواوين الثقافية و الأدبية

حب مات

ظنيتك نور جاي من لهلال
باش يضوي حياتي نهار وليال
و قلت نورك جا يمحي هم طال
وينور وقت ليلي عل لحزان طوال
حبك حنطتو و علقتو،و درتو فال
ذكرتو ف شعار و برح بيه دلال
شعار كتبتها وغنيتها ف موال
تيق قلبي بلا ما يشاور البال
ما كنت طامع ف جاه ولا مال
من نهار بست على عنقك الخال
ثقت بكلام لسانك حيث نطق وقال
حبي ليك دايم ، ما يفنى ولا يذبال
وفكرت نهديك فراش ف لحلال
وقلبي نديرو ليك عل ظهور جمال
كانت أقوال صادقة مع فعال
لكن ف رمشة،حبك مات وزال
نطقتي بكل ما جاك عل البال
بهديتي ف يديك ، مشيتي ف الحال
كنت كتشطحي وتلعبي عل لحبال
ما راعيتي حالتي الغارقة ف لهوال
حبك ما كان غير قيل و قال
خاب ظني فيك ، حبك غير قوال
خدعتيني و رميتيني ف بير لهبال
غارق و مظلام بحال حبس بلا قفال
سوارتو عند لي عرشو ف العال
هو القادر يشفيني من حب محال
ربي يعوضني بحب حقيقي بحال
ديال لي كانت عز من بنت الخال
يمكن ترميتي ف حضان ؟ نسال
ملي أنت نكارة، سلمت حبي لحمال
يرميه ف قبر تالف بين لجبال
ما يترحم عليه عاشق من لجيال
الصنهاجي حميد
السبت 17 نونبر2012

الاستاذ المبدع حميد الصنهاجي
سلمت الانامل التي خطت هذه الزجلية الجميل
هنا قرات لك قصيدة معبرة ورائعة ،نالت إعجابي كثيرا لانني لمست فيها تجربة جديدة تختلف عن كتاباتك السالفة
مزيدا من العطاء
لك تحياتي

جميل ما خطت اناملك
اخي حميد الصنهاجي
زجليتك متميزة
دام لك العطاء
تحياتي
و سنة سعيدة