ريح لفـْراق ،
هـزّ الشجرَه من جدورها
طيـَّرْ العشْ مع لوراق
وطيـّحْ عروشها
نوَّض لغـْبار
عمى لـبْصار
جيـَّح لـَفراخ
شي تـْلاح يْمين
شي تلاح يْسار
شي فـْتـَحْ جناحُه ليهْ جْلاه
ومْسـَحْ خبارُه وماتـْلى حدّ لـْقاه
****
كيفْ يَمـْكن تـْجي هدي من المحبوبْ
ونـْقولو مقدَّر ماصار ومكتوبْ
حْبيبْ البارح ولـّى عـْـدو
لاحْ الخاتم من يدُّه
بـْكى وشـْكا وقال هوَ المظلوم
ومْشى مْخلـّي وراه شلا ّ هْموم
****
غـْربات الشمس وبـْقيتْ وحْدي
كيف نـْسميوْ ف المكتوبْ هدي
نـْبات فْ لـخـْلا(ء) موسَّد دْموعي
ما تـْلا حدّ مـْسايـَن رْجوعي
هَجـْروني الناس كبار وصغار
ورْماني زْمان ف الطرقان شـَمـْكارْ.