عرات ليام عليام
وبانت سوايع مغمومة
فاضت بشلا ظلام
وسالت ريوقها المسمومة
غيمات على سمايا كدوب
ورسمات لعيني زواق
مهموم بغيت نتوب
عقلت ودربني لفياق
وزادت بصباحها تغريني
وبلوان طيورها تلالي
زليت حسبتهاتبغيني
وقلت ماكاينش بحالي
شرقات شمسي في عشيا
وحليت عيني المسدودة
مجدوب انا إلى انتيا
وحصلات فدقايق محدودة
هيجت فكارها بحروفي
وقلت سمعيلي ياخيتي
سقيتك دمعي من خوفي
بكيت وبيا ما دريتي
قطعت لحمي نرضيك
وبنيت كوخك بعظامي
حرقت صدري يدفيك
وسهرت نغازلك بكلامي
وسعت حلامي تكفيك
ورضيت برضاك يكفيني
حالك مع من يبغيك
وحالي مع لي ما يبغيني
وبانو النياب لمضرقين
مضاو فيام لغفلة
زادك يا راسي فين
وضوك فليالي كحلة
نبداك يا طريقي منين
واشمن تاويل ندير
دازت من عمري سنين
فاتت ومشات بالخير