نعيبو الزمان
والعيب فينا
نقول غدار
والغدر طبعنا
بنادم يغلط
وكاع ما مْسوق
فَ الذنب غارق
وحالو ما مْقــــلق
عايش بلا نية
وغير بالحيلة
كل نهار بلون
بحالو بحال ا لحية
يتمسكن حتى يتمكن
وعلى مولاه يتكبر ويمن
حالو ما بغى يتصلح
بْشَرو وسوء النية
عمرو ما يفلح
لاخير فَ لسانو
ولا راحة فَ مكانو
نارو على منقارو
خارجة من دارو
تحرق كل من جاورو
يحقد على الغني
وْيتشفى فْ دونو
وهو غير جمل
ناسي حْدبتو
ويعيب غيرو
القلب لمغير
الوجه يعطيك خْبارو
ياسالك هاد الدرب
عنداك مَ شْرارو
عين بنادم فارغة
ما يعمرها غير التراب
كنوز الدنيا ديالو
وحالتو حالة غراب
ف الدنيا باغي يخلد
وعلى الاخرة ديما مبعد
هواه تقودو نفس مشؤومة
عاجبو راسو وما عليه لومة
من بعد موتي
نتمنى تتحقق امنيتي
مصابني نعيش فَ الدنيا
مرة اخرى
نكفر على ذنوبي
ونحلي كل ضارة مرة