زمان يحنث

زمان يْحَنّثْ
ينتف لحلام من مشاتل اليوم
و عينُه على حْلام غدَّا
ياصاح ,فيق حلامك
قبل لا صهد الوقت يبدا
وتسيح على لسانك سيحت زّبدَه
يتلف لك راس الخيط
وتْخَبّل بْجَهْد التَّلْفْ الكُبَّه
لساني فكلامو تعثر
تأمل حلامو
لقاها سرب طاير بجناح لِياّمْ
طَيْرُو الخوف وجهد الوقت...
غناها نوح
بح صوتها من البوح
الشمس لبست يامي الكحلة
وطريق لحلام صبحت ظلام
تلْفات حلامي سوارها
صبحت وْهَام
من همي تْخبلت لي لفهام
ونسجت من كبة لملام شلا كلام
صنعت من قلبي مصنع يغسل لعقول
يعمرها ب حلامُه هو
يصنع دنيا على قدُّه
يعيشها طول وعرض
ويشيط ل ليام
يصنع لحلامو سْمَا'ء'
يشرڭ كرشها
يْطَل عَلْ لْحْلام البكمة
للي تلفت وشدت لرض
مشات يامها ف لْبْكا
طيحت الذل على كل من ندد وشْكا
تأمل ذ الحال يا راسي :
هذا حال الدنيا
حلام تفوت
وحلام تفرخ موت
حلام ف الظل تذبل
وحلام بح منها الصوت
تعاني ف سكوت
يْلا جيت نصبر يفوت فيا الفوت
ونصبح لخوتي مقال ومحضر
آجي يا راسي نزرعو مْشَاتل ْصَبْر
باش نحقق حلام خرى
خصني عمر جديد
جدة ليام جاية وجايبة ...
لملمت حلامي ومشيت
من خوفي عليها
كريت رموشي حمال
حملت سرب حلامي وتسنيت
الحل يجي
وملي ماجاش أنا مشيت
نورت ضلوعي بكل لوان الطيف
سكنت فيها سرب لحلام ضيف
خبيتو بعيد من كل حيف
لكن الظلم يدو طويلة
ماتفرق بين غازي و ضيف
وسرب حلامي عنيد
تشم ريحت عنادو من بعيد
توسدتو
كتمت صوتو
لكنو مل القيد
عياو جنابو من رقود
لجم لساني ما بين ضراسي
خرج وشم عبق لوجود
تخيل حياة بلا حدود
حاول يحلق ويطير
لكن كيف يدير؟
قصو جناحو
كبحو جماحو
صادرومنو حق التعبير
سمعوه من لمنقي خيارو
قالوا :حلمك ماشي قياسك
مد رجليك على قد لحافك
بكيت سرب حلامي
دبحوه
ولا دبحو عليه
نصبو عليه
ولا نصبوه ف مقام ماشي مقامو
بحال بحال...
سماوه سرب ليام
أنا كبش الفدا
و ماشي خسارة فيه
ما بغا ينسى حلامو
وخا على صفحة ليام لمكحله بعماه
ما كاين غير النسور ودياب
وما كين حمام؟!

زمان يْحَنّثْ
ينتف لحلام من مشاتل اليوم
و عينُه على حْلام غدَّا
ياصاح ,فيق حلامك
قبل لا صهد الوقت يبدا
وتسيح على لسانك سيحت زّبدَه
يتلف لك راس الخيط
وتْخَبّل بْجَهْد التَّلْفْ الكُبَّه
اختي الفاضلة المبدعة المتألقة مليكة الفلس
أشد على يديك لهذا الابداع
وفي انتظار جديدك الأروع
لك مني أجمل التحيات وكل التوفيق

اخي سعيد محمودي
سعيدة لكون كتاباتي تلقى إعجابك