سوّلتْ النجُومْ

فْ السّما

ردت علي الكَمْرة

بغَمزَة

فين الشباب والروَاية ؟

نبتت شِيبة..

فين الغنا والمَاية ؟

خرجت نْحيبَة ..

فين لْحْدق وْلعْناية ؟

وليّت عْيوبة..

فين الصبر وْلمْناية ؟

رجَعْت خِيبة..

رْكَب الهم كَلبي

وصَار

غَدْوي وعْشايا..

والغَم خِيطي

وسْدايا..

نْديه ونْجيبُو

كُبّة

نْسرّبها

من مٌغزل لحْزان

مَال منسجي

طارت نيْرتو

وطَاح بلا رٌوح

وبَرّادي

تْبدل قْدوح

تشتْتو شْقافو

وشْقافْ راسِي

توضّر ليا عقلي

وتهْول خَاطري

وكثْر بكايا

وتعْدادي..

على الشّاب الضّايع

والشيخ المَايع

ولْمْسيح للي دايْع

راكْب سَبْع

بحُور

رْماتو مُوجة

غْدارَة

عَافوه النسٌور

وعْلى دْراري

ما بْقاو

يْلعبو

لا حَابة لا خْطور

لفشُوش ولهْبال

وخِيبة

السّيفَة

ولبْنات

ولادْ ذكُورْ

لا كَصّة باهية

لا عْكر فاسي

لا بْخور

يشُوفو منك لْهيه

يْتكَيشو

ويشَيْشو

ما شادّين

على جَمَرة حمْرة

ما ينحْثو ف صْخور

حْسبت حسابي

وخْلطت

وَدْعي وتْرابي

بِسم الله كَلت

طَلعتْ

اللّيف بلا هَمزة

وفاهْم

وحْمقْ

ودبْزة

وعِين

فُوق الحَاجبْ

وعينْ

تحْت لمْنخَار

ومْديونِيرْ

ومْليونيرْ

وخَنصْر مْخنزَرْ

وسْبّابة ...تْختارْ

وْارَا

وْسيرْ

مَاشي دَابا

وخْريفْ مصّيف..

ورْبيعْ مخرّف..

وذبّانة

ودبّابة

وسْبَعْ

غَارْدو دِيبْ

وضْبابَة

وغْبارْ

وووو..

ها

الرّبحْ

ها

لخْطية

ها

الدّايمة

ها

الدَّنيا

وااااااش

من دْنيا

هيا

وييييييها

اآآآآآآش

من دنيا

هي

ولالالالالات