مابين التراب و السحـــــــابْ
عيشة الدود والنســــــــــــرْ
شي ف النعمة بلا حْسَـــــابْ
وشي يحلب ف الصْخــــــــر

حالك يا ليتيم غْـــــــــــــلاَّبْ
حالي من محانك دْبْـــــــــــرْ
دمعي على دمعك صْبَّــــــابْ
قلبي فجراحك عْثْـــــــــــــــرْ

مالقيت لسقامك حجَــــــــابْ
مالقيت لجفونك شْفْـــــــــــرْ
مالقيت لك جهد م لمكْتَابْ
عليك بالله.. و الصبــــــــــر

المسكين ماعندو حبـــــــابْ
مكسور لجناح والظْهَــــــــرْ
الناس تمقتو بلا سْبَــــــــابْ
وزمان يامو نْفْـــــــــــــــــرْ

المسكين طريقو ضبَــــــابْ
رجلو تْخَطْوي على لْجْمْـــــرْ
المسكين ماعندو صحَــــابْ
يحكي ليهم ويهْضْــــــــــــرْ

خويا المسكين لقلب طـابْ
صبرك ماراحشي هْــــــــذْرْ
لفقر عمرو كان يتْعــــــابْ
وَاصْلْ لْغنَى كَانْ فْقْــــــــــرْ

الدنيا مطويا كتـــــــــــــابْ
و نقش فصْفَاحْها لقْـــــــدْرْ
يا حفيد الطين والتــــــراب
تسكن لقصور وتْتْغَـــــــــرْ

تحضن بجناحك لسحــــاب
تْحَلَّقْ فْسْمَاكْ تْتْكَبَّـــــــــــرْ
وتفوت يَّامْكْ سْـــــــــــرَابْ
يْرْشَاوْ جْنَاوْحْكْ تْخَــــــــرْ

حكايتك من تْرَابْ لْتْـــــرَابْ
الباقي من سحابك شْبْــــــــرْ
دنيا لمحان و لْخْــــــــــرَابْ
إذا جادت لازم تغْــــــــــــدْرْ