سقف خيالي



شكون اسقف خيالي

يبني طوب هبالي على طوب راشي

تكبر المنامة نحكيها لغاشي

تترعد جراحي تنطق قراحي قدري ماشي

تنبت الدركة من الصخر

كرموسها غدر حدج مر

والصخر دمو جمر

جبح لكساد فيه الضر

خرجو سلاكهم حمر

نكسو الساحل نكسو البر

جمعوالخيربضو البدر

فعماقي زناقي من الهم تقاقي

من عطور القيح زادني الساقي

بياض الدم ساح بين سواقي

متلف ليام متلف وراقي

مبخر بجناح راس شاقي

النية مولاتي ساكنة داتي

راكبة عود حماقي

من غيار الوقت طلبت طلاقي

كبرت مغبون من هم الهموم نعاني

شيبي نبت طلع براني

لمري كداب دارني شاب تاني

فدواخلي سايح غريب داني

سيفو بطار كحل سوداني

ايفيق على نواح سنتير

ايجدب اينطق بكلام الغير

يشرب يسكح دموع البير

يترعد يتمرمد بين لعقل والضمير

وانا مرهون مقرد بدون تعبير

كلامي عرام من لعدم ايغيس

يجيح يقيح تفقس لمراير وتقيس

قياسي قياس لمحاين فراس التعيس

فدواخلي سوق ما بحالو سوق

فيه الدكراد فيه اللسان محروق الفرح مسروق

من صداعي دارو جوق

تغنات لحكاية فجنان الشوق


ماضنيت نكونو جوج

واحد مخفي و لغاه يروج

وانا ظاهر حالي مقجوج

طل مني لغريب ياداني

فرك لحمام غبى ما جاني

شكون اوريني الطريق المساوي

شكون يغير حالي فدخالي ديب عاوي

واد المحنى يكب فعروقي راوي

فكفو بخور وديار وجاوي

فعنادو كد فبعادو حد ريقو سماوي

شكون يمسح السما بليكة

نكتب فيها كلام نزوقها برشمان

نوزع فيها وزيعة

نحرتها بالحلام نسقيها عوام تعود رفيعة

لحت عيوني لداك لقطع

بانت جراح بين سراب تخلع

والدياب تغزل فالخديعة وتتخشع

غرد لغراب فوق جيفة لحزان

موالو علة تتقب لودان

صياد النعام ما لكاها

عمر قرابو بالريح وزاد وخلاها

شكون يبيض كحالي وينكس خبالي

ركبت لهوى غنيت الحال عيط بوهالي

الودع جوهر فخيالي

مدربل هوالي

احساسي ردم من تسراب صور عالي



عبدالرشيد عمهم