عرض مسرحي

(السينوغرافيا وتموضعات الممثلين خلال العرض حسب رؤية المخرج )

..........

بداية العرض

(صــوت الهــجــهــوج وآلات موسيقية أخرى)

(عزف في نفس الوقت لكن كل آلة تعزف موسيقى معينة)

( الإضاءة خافتة )

فرد 4 : ( يغني ) غايب غايب .. كّالوا يا كّلبي انت غايب .. كّالوا ياكّلبي الوقت تبدل ..وانت فالنوم غايب

( إضاءة في نفس الوقت الذي يبدأ فيه فرد 2 الكلام ) ....

( ــ بعد ذلك يتم التعامل مع الإضاءة حسب الموقف أو المشهد ــ )

فرد 2 : آيومي .. شحال طويل آيومي ..شْهودي فيك شْعاع الشمس ..تغيب الشمس ويموتو شهودي .. يا شعاع الشمس اللي غربت .. دفّيني

فرد 4 : غابت الشمس وطاح الليل .. للنور ما لقيت سْبيل ..لْخصام غدرني .. عماني .. النور هجرني وما بغى ينساني ..بغيت الشمعة نشريها .. بانفاسي .. وخّا صغيرة .. نشريها ونقاسي ... يالشمعة مالك داتك عزيزة ..لقدر واحد .. ضحي يالشمعة وتموتي عزيزة ..انت تكوي وتدوب .. هد الشي ماشي مكتوب ..لكن ضحّي .. الدنيا تجيني كيف المجدوب .. ونرجى اصحاب لقلوب ، والظلام يصبح غُنية

فرد 3 : نجوم عن حالو تحكي .. على هروبو ونواحو تبكي ..قطّع فكّلب الحْجر ، ما قطع فكّلب بنادم ..خوفو من لْبلا ولْمصاب ولاّ هو الحاكم .. مسكين .. حاير .. ماعندو لين .. فصوتو تسمع محنّة ما تسمع طْنين .. زاد على جنب الواد ما لقى كّنْطرة .. زاد حفيان .. عريان .. خايف يعتر فحجرة .. آش به دار الزمان ياناس حتى ولاّ هكدا .. علاش لعداب علاش لضْرار .. علاش محانو زايدة

فرد 5 : هد الكرة ضاقت باللّي فيها .. تنفست ارتاحت لعب الريح بها .. ما بقات تليق لملاق .. شدّها الخراز ما لقى ما يصلح فيها

فرد 1 : الفلك يدور والسوايع بدّالة ..اليوم راك مكسي غدا تلبس دربالة .. احض راسك يا خيي ... ياداك الفنّان لا توقع في هد الحالة

فرد 4 : مالك ياكّلبي متعنّت .. مالك عاصي .. ما باغي تْحْنت .. مالك ياعقلي مالك قاصح ..تبّت آوا هيا تبّت ..آعقلي .. آكّلبي .. جاوبو .. ياك ما خفَت عليكم حاجة كلشي كّدامكم واضح .. القديم والجديد معروف ..وغدّا ماشي البارح .. خلاصي .. فين خلاصي ؟ مرادي نرتاح .. خلاصي وين خلاصي .. علاش تزيدوني لجراح ؟

فرد 3 : ( يغني ) كلشي فحياتو هاني إلاّ انت يا الفنان .. ادا رشات قلوعك وجات لرياح بشدة .. ولاّ عقلك يخونك وبغات الدنيا من اليوم لغدّا .. على من رميتي عارك ؟؟ الناس حارت فشْعارك .. تبات تفسّر فاسرارك .. علاش هجرتي ديارك حتى انت ؟

فرد 2 : شوفو شوفو بعدا ..شوفو معايا لهيه فوق لكدا ......

ــ ينهض الجميع ويتحلقون صوب إشارته ــ

..... شوفو النور غطّاه الدْجى .. والنجوم طافيا حياحا فالسما .. شوفو خيمتنا اللي كانت كبيرة وبالوتاد ولاّت وطا .. شوفو .. شوفو بعدا ..شوفو لعجب عرب ..غيمتنا روات وسحات .. حْبانا الله فوقت كّبل لوقات .. وكدّبنا

فرد 3 : كلشي سمن كلشي عسل .. كّولو العام زين .. كيف كنّا وكيف بتنا .. بعد ركوب الخيل ولمكحلا والكمّيا حرّاكّا غاست شمسنا فقبر مظلام وتسدّ عليها بقفل .. الدعوة لله ولاّت ايامنا تخراف

ــ يتفرقون ــ يوجهون الكلام لفرد رقم 4

فرد 1 : ياساير وحدو .. وما غادي لاين ..شكون آوا برّد فراشك ولاّ جر غطاك .. مضيوم انت .. وهاز شلاّ ضرب ومحاين ولا غير شي فدواخلك سكن .. واكّف وحدك فليالي ..شكون تعاين ..يا الماشي حدب .. الرجا واعد ونساك

فرد 5 : فتنك آمسكين شعاع شمس فجرها خاين ولبحر لعب لعبو وبين الصخر رماك .. طوال ليلك وليام زادت فتنعال .. رد بالك لحزان فطريقك شوكها ما باين .. فات عمرك تشكي بضر .. ليوم اسمعني عفاك .. تمايل لا تركع .. ناور مرة .. مرة هادن

فرد 4 : ( ينشد ) مكسور لجناح مع لرياح نعاني .. مسا وصباح لمرارة قدح تلقاني .. نبكي على هموم الناس .. وهمومي نسيتها وخّا ساكناني .. هذا حالي ما لقيت مفتاح .. تحمّلت شلاّ طعنات وجراح .. باكي وخّا الدمعة ناشفة من عياني .. مدفون فقبر منسي ما درت شر بيدي ولا قلتو بلساني .. ما عندي لا سلة ولا عنب .. مجرد من كلشي .. واش اللعنة واصلاني

فرد 2 : اضرب الكف عل الكف يجيك كلشي بسرعة فشي وقات ضرب الكف ما تكون فرحة ولا خلعة .. الخواف ما تخاف عليه مّو هدي حكمة مل الجدود ورثناها

فرد 3 : ــ يوجه كلامه للجميع ــ الحكمة قالوها اللولين أما حنا نسيناها .. وقعنا فحكاية لغراب .. مشيتنا تلّفناها

فرد 4 : آش عملنا ما نخلّيو واش من كلمة زينة قلناها .. واش زرعنا لولادنا يجنيو لشجار بيدنا قطعناها .. آش درنا فكتوب لحفادنا يقراو .. حتى اللي كتبو لجدود اوراق حرقناها .. أنا واش نكون ..جاوبني يا العارف لا تخلينيش تالف سايل انا دلّوني على وْجودي .. بغيت نعرف وجودي .. سال عليّ الزمان وسال فلان يحكيلكم خباري.... وهانا غادي

فرد 1 : أفين غادي

فرد 4 : ( ينشد ) غادي غادي غادي ياه

الجماعة : ــ مع اللحن ــ فاين غادي

( يكررونها )

فرد 4 : ( ينشد ) دمعة لفراق سالت من عيني ، وبكيت آنا على حظي ونعيتو .. دمعة دافية جات تواسيني .. تديني بعيد نشوف السعد اللي ما ريتو ... ملّيت الدموع وملاتهم العين معايا .. ونعت القوة زاد فعمايا

فرد 5 : كتخون الشمعة والبيت مظلام ؟

فرد 4 : خانوني صبعاني فتحراك لقلام

فرد 2 : كتخون الدمعة فتكّة لندام ؟

فرد 4 : خانوني احبابي وزادت ليام

فرد 3 : إيـــــــــه يا الفنان !

فرد 4 : ــ بانفعال ــ إيه آ المحاين .. إيه آ لفقايص .. إيه آ اللي غادي تايه ...........

ــ يجثو على ركبتيه ــ

( مـــــــــــوســيــــــقــــــــــى )

.......عييت خازن في كّلبي واليوم فضحتني لقلام ..... نكرني وانا قبالتو ..قال للريح شطّبو مع لوراق .. داق لعسل وانا حلاوتو وسار يلالي فلسواق

فرد 1 : آجي آخويا .. ديرني صاحبك وعاود لي همومك

فرد 4 : درت صاحبي نعاود ليه همومي ضنيتو يكتم لسرار .. خيب فيه مفهومي لقيتو براح بها عطار .. زاد عيوب على عيوبي وبقى ينقل لخبار .. خير خليني أنا و وحيدتي

فرد 5 : وحيدتك .. شكون وحيدتك ؟

فرد 4 : راك فضولي .. كتسول شكون وحيدتي .. شكون ديك غزالي ..شكون آنا وفملك الله آش نكون .. واش درت ياسيدي ربي من افعال واش بادي .. آش بادي من تفصال لمقال على دات وحيدا .. تاج الكّلب ..يلا كان فراشها ضحك وغطاها لعب .. را وجهها مدبال ... وحيدا ياناسي دمعة فعيني شايخة .. تسيح باردة وتمحي فخاطر عجاج ما يصفى بنسيج قوافي

فرد 3 : ( يغني ) ..طل بعينيك تنظر حالي يامحبوب عني سال .. بالليل دموعي تسيل .. والشوق فكّلبي بالي .. وخيالك نجري ليه يهرب مني .. والخاطر ما هناني ..كل حباب وكل صحاب لفراقها اوقات ..كل طيار فكل اشجار لغيابها حدود .. ومحبوبي انا ان غاب محال يعود

فرد 1 : وحيدتي انا رفيقة لجيال .. آوحيدا سلكي معهم لجبال ولهوال ..تخطاي الشوك .. طلعي .. وزيدي طلعي لا ترضاي بزين لكّمرة لا تبقي بتقويسة لهلال .. لا تبكي على صروف الدنيا .. ولا يغمك فيها تخمام ..لا تركّدي على من صدرو لوحة .. لا تعشقي من نيفو كّمحة لا تكوني م لغشام .. ومن خسارة سيبة لعوام الفانية غزلي راس المال وبداي

( نبرات موسيقية )

فرد 2 : أنا عندي وحيّد ... لا تشوفو في نظرة .. خيي يا داك الراحل على غفلة .. أفينك يا ولد مّا .. وفينك انت بعدا .. شحال آ خيي منا مشى .. وشحال حامل فشباكك هنا على مساعف سوايع ومدبب لعوام .. الخاطر مفكّوع ودكة تخمام وصدر كامي هموم شلا .. وحتى من شقاه من طبعو عوام بعدو قدّر وقضا

فرد 4 : عرفتو .. راه خويا محمد .. آمحمد .. تبع العربي .. ياخيي مسح الدمعة .. شعل فكّلبي شمعة .. فين نصيبك وتصيبني فهد الظلمة

فرد 5 : فلكّلوب قلال التيساع .. اعطيني دراعك به نشالي نردو صاين .. وهاك دراع الخيل تلفت ترباع ... وفينك ... فينك انت بعدا ؟

فرد 1 : كنتي فنان حق وحقيقي .. وفيك نفذ لقضا ومن الصدمة شخصت لبصار ... صابتني دهشة وبقيت مشلوط حاير محتار .. عاد كنت معايا يا خليلي وصوتك نتونس به ... نعزي فموتك يا دليلي ولاّ فنك نرثيه ... ما بقات شجرة بدون تحراك الريح وفكل جهة نعيك داوي ...لوعة حسرة فراغ ثقيل يولد شوق فالجوف كاوي ... شعلت فصدور مشاهب ولا صابت عنك صبرا .. يالطالب اكتب ألف حجاب عسى كيتو تبرى

فرد 3 : ( يغني ) هلا صبرتي يا شراع .. يكمل الصراع يا شراع .. من شد الريح تزيد ولهوال علي تزيد .. هلا صبرتي نزرعو الخير .. نوصلو للبيت الدافي .. نحصدوه عركّنا ونطحنوه خبز حلال .. ما هْدفنا يوم كان مال ولا من غير شيمة الرجال غير الدجال يحلف لا يغيب ..هلا صبرتي ياشراع

( صمت قصير )

فرد 4 : نسولكم ... العريان باش يزيان ؟

الجماعة : بخواتم فلان

فرد 4 : باش تشبع كرش الجيعان ؟

الجماعة : بمرق الجيران

فرد 4 : وكيف يكون النسيان

الجماعة : بكثرة لحزان

فرد 4 : تعجبت فهد الزمان .. كيف ولاّ وكيف كان .. تقلبت لوزان والمستور بان .. هذا حالنا وحنا مّاليه

فرد 2 : كان هنا ... شدّاه لهيه ؟

فرد 3 : اللي تلف لا تورّيه

فرد 1 : خلا العسل وشرب القطران

فرد 5 : بكثرة لفهامة غراب تلّف مشيتو بمشية الحمامة

فرد 4 : ماشي حشومة .. الشمس شارقة وتقولو مظلامة

فرد 5 : كيفاش .. فهّمنا

فرد 4 : والو .. هذا غير هبالي وكلها عندو هبالو

فرد 1 : آلسي الفنان .. الفنان ما يخبّي فصدرو لحزان

فرد 4 : لحزان زايدة يا صاح ادا كنت غافل ..

فرد 1 : خبّرني

فرد 4 : نخبرك ؟

فرد 1 : إيّه خبرني

فرد 4 : بوحدك ولا كاملين

الجماعة : ــ منهم من يرددون ــ كاملين ... كاملين .....!

فرد 4 : غادي نحكيلكم قصة واحد الفنان .. كان يا ما كان فدواير الزمان ...

( يلتفت يمنة ويسرة ويبحلق في الجماعة )

...لا تلوموني يا ناسي وياناس الحومة .. هد الكلام سبقتو قلتوه انتوما .. منكم سمعتو وفهمتو .. واللي سمعتو نقولو ما نخاف .. ما نخليش الكلمة مسجونة مكتومة .. انتم قلتوه البارح .. وانا نقولو اليوما

فرد 3 : الثقة فيك زايدة .. ومننا غير تهنّا غير قول

( الجماعة تستعجله ليحكي )

فرد 4 : بدات لحكاية بتكريم فنان ... جا .. وخّا هو مريض .. وحتى ولدو صرعو المرض الفتاك وما كاين دوا.. قالو التكريم ساعة ماهو عشا ماهو غدا ... الضرب فالتعريجة بدا مصحوب بانغام فاسدة .. الطوموبيلات شلاّ .. والمْكان اتّملا .. هكدا كان عرس تخسرت فيه الملاين هكدا .. فيق ناس كانت راكّدة .. طلبوا من الضّْيوف تساندو .. تغزل وتوجد ليه السدا .. تعطيه فين يحط لخيام .. وهوما دياب تتحايل عليه فالظلام ..شطحو ليه حتى تاق فيهم واعطاهم يديه توسدوها ... خلاوه غمض عينيه وبداواه من الكبدة .. عرس كلو خديعة .. ضيوف وهوما وزيعة .. يشطحو شطحة سريعة .. وديب فيديه برا يلوّح بها ويقول لضيوفو دقوا الطبول .. خونا فتح البرا وصاب الفجيعة .. البرا فيها درهم زريعة ...

( حركة .. هرج ومرج ... أصوات متداخلة )

فرد 3 : ( يغني وسط المشهد ) الفرجة بغات الهنا .. الاكتفاء الذاتي فالقوت .. لا حقوق لا ضمانة ... بلا ما ما عاش الحوت ...

فرد 5 : شقيت عصا الطاعة على الذات وقلت علاش ما نترك ما فات ... حسيت بداتي فارغة مثل الأموات فقدت النشاط ورغبة فشلا نزوات ... لقيت راسي فريد .. وحدي ما ساوي .. فأرضي وغريب نجبر وحشة وكواوي كّلوس يقتل طبّل فالما تصيب رغاوي الفراغ الفراغ كثر وزاد الوقت الخاوي

فرد 1 : شقيت عصا الطاعة من جديد وكّلت اسناني تغزّز القيد .. بإصرار كبير ..نقزت لفوق هربت لبعيد

( ذهاب وجيئة وسط الخشبة .. همهمات وحركات ..لا أحد يستقر بمكان موسيقى وإضاءة متنوعة متتالية )

فرد 4 : شكون خويا وشكون صديقي .. شكون عدويا و فين طريقي .. جات سحابة .. باقوال كدابة وهدير دبابة تلف طريقي ..شكون خويا وشكون صديقي شكون عدويا وفين طريقي

( الجماعة تردد نفس الكلام ..لكن بطريقة فردية متفرقة في تفاوت )

فرد 3 : ( ينشد ) بين الكديات كان الميعاد يسترنا الليل وقدر الله .. وخا جا الواد برحالو .. وكانت الحملة قوية .. الكّلب فينا اتّدفن حالو .. ما يتّفهم لغازو قوية

( الجماعة تبدأ في التحلق حول فرد 3 )

( الكل ينشد ) بين الكديات كان الميعاد .........................


ستار

................................................

قدم هذا العمل كمسرحية زجلية بمناسبة تكريم المرحوم لمراني الشريف يوم 4 / 7 / 2004 في إطار فعاليات مهرجان ــ عرس الوفاء ــ الدورة الثانية إحياء لذكرى وفاة المرحوم محمد باطما

فكرة وتصور مسرحي + جمع الأزجال : عبدالسلام السلطاني

الكتابة المسرحية : عبد السلام السلطاني + التهامي بورخيص

أزجال : محمد الباكي ، عبد الرحيم باطما ، محمد الطجني ، عبد السلام السلطاني ، مجموعة لمشاهب ،

سينوغرافيا : التهامي بورخيص

إخراج : التهامي بورخيص بمساهمة عبد السلام السلطاني

تشخيص : محمد الباكي ، نرجس الحلاق ، عثمان الوهابي ، محمد العربي جامع وعبدالسلام السلطاني

أصبت وأحسنت أخي العزيز الاستاذ عبد السلام السلطاني أسلوب العرض المسرحي جدا رائع استمتعت به وكأني بينكم . شكرا لكم جميعا على هذه المتعة الزجلية الفنية ولجميع الاطراف المعنية بالفن المسرحي
كما اسعدني وجود اسماء مميزة في هذا العمل الكبير والنبيل انه بلفعل عرس وفاء
وتكريم أسماء لامعة حاضرة في ذاكرتنا دائماً. رحمهم الله واسكنهم فسيح جنانه
محبتي وتقديري

الأخ سعيد محمودي

في البداية أشكر كل ما جاء في كلمتك تعليقا على الموضوع

فكما يظهر ..قد راق أخوتك أن يتم نشر مثل هذا الموضوع وما يحمله بين طياته

كما أطلب الله بدوري أن يرحم كل الفنانين الذين ألهمونا ما به أضفنا لأعمالهم

ومن جهة أخرى

أقول أن نشري لهذا الموضوع

جاء كمحاولة مني الإتيان بالجديد .. وتحقيق الإضافة لما تم التعود على نشره بمنتدى الزجل

وكذا إيجاد موضوع لتبادل النقاش حول مكونات النص وسياقه و إنتاجه كمادة مسرحية

ثم مدى نجاعة القيام بمثل هذا العمل مثلا من عدم جدواه

هل أضاف شيئا ...هل حمل خصوصيات معينة ... إلى أي حد يمكن تطوير مثل هذا النوع من الإبداع

؟؟؟

تعدد ناظمي الأزجال وخصوصية القريض عند كل منهم ...

هل ظهر تفاوت في مستوى الكتابة أم أن هناك ما يربط هذا بذاك

هل الحبكة كانت مقبولة


ثم يمكن مثلا أن نستحضر الزجل وتناوله في أغنية الجيل أو الظاهرة الغيوانية

هل أفاد أم استفاد ؟

هل يمكن القول بأن الزجل في الظاهرة الغيوانية يأخذ ملامح خاصة

نعرف أن تجربة أغنية الجيل أو الظاهرة الغيوانية خرجت من رحم المسرح

فهل خدم المسرح الزجل أم استفاد منه ؟

إلى أي حد يمكن أن يلعب الزجل دورا جديدا في تأثيت التجارب المسرحية المعاصرة

هل يمكن أن يكون له هذا الدور على غرار دوره في سيادة أغنية الجيل

الخ ... الخ من النقاشات والتناولات التي يمكن الحديث عنها



؟؟؟

ها قد حاولت من جديد ...

!