منتديات دواوين الثقافية و الأدبية

ثـــلاثـــة د لـــعـــيــــاد

اليوم ، أ الغالية عيد ميلادك
طل علي بدرو من قبرك
وجهك منور و تشيري بديك
علاش ضووما وصل لدارك ؟
اليوم،تولدو زوج توام حداك
قولي لي،نهنيك ولا نصبرك ؟
بينهم،زاهي مخنتر،جلس عيدك
واش ف بالك ولا نخبرك ؟
اليوم لثنين،عيد الفطر صطادك
باش عيد الشباب يزن أخبارك
عياد الثورة والفطر، بميلادك
يهنيو، وريحتك ف نوارك
هناوني فرحانين حتى ولادك
وأنا حزين جالس نبكي جوارك
ف هاد لعياد دوزت كل وراقك
ما لقيت حتى سطرعلى صبرك
ضري يزيد ف لكبرعلى فراقك
باين مزمم ف لواح سرايرك
وغرامي ، وشامو على بابك
ما تزول وخي يتهدمو سوارك
ضاقت بيا الدنيا ف غيابك
حاير،عاونني أنا ف عارك
لا ترغبي لاطلبي مني نغير ودك
ضعيف،ما نقدروخى بتحجارك
حب زرعتيه ، كان حصادك
ثمار كثيرة ميلات شجارك
النور لي شعشع طول وجادك
ما بان خيال بهاه على غيرك
كلهم ما يوصلو نقطة من وادك
ولا حتى لحلاوة عظام ثمارك
وخى درتي التراب وسادك
وغطيتني بصم ،خذتيه من حجارك
سيدي و سيد سيادي نداك
طاعتو واجبة حتى ف ضرارك
رغبيه ودخلي عليه بجوادك
يجود علي . وذكرني فذكارك
ما طامع غير ف بيت حداك
فيه نسعد و نكون ديما جارك
هوصداقك ، وربي شهادك
ونكون عاوتاني ف حضارك
و ما نتعطل ف حضور وجودك
أ بيك ف الجنة تطفى جمارك
وكيف هنا ، ديما سعدت بودادك
نكون حتى لهيه من قدارك

حميد الصنهاجي
الإثنين فاتح شوال (عيد فطر) الموافق ل 20غشت 2012

اخي حميد الصنهاجي
عيد مبارك سعيد
واعاد الله عليك هذه الاعياد
يفرح وسرور
وابعد عنك الاحزان