الفكاهة:آها آها
الفكاهة ؟
ما شي ها ها ها
الفكاهة : حداقة و نباهة
و كاين اللي بداها
ما عرفنا منين جاها؟
و الفكاهي ؟
ما شي هي هي هي
الفكاهي : كلامو باهي
ك ينبه الساهي
ف طريق معوج
و يفيق الفاهي
يلغى و يفوج
يشرح القلوب
و يخفف الحمل ع المغلوب
ف كل كلمة حكمة
و ضرب ل مثل
ل شي وذان نغمة
و جواب لمن سال
و ل شي فوام بسمة
تزين الحال و تزرع الأمل
و ل شيب وجاه
( منين جاهم الجاه)
عشقناها تكمة
عكدناها لكمة
و ضربة قاضية
ياك ما ؟ نرشو الما
نفكو القضية
باش ما
و شكون قال ؟
و كوميكيا
واش من كوميكيا
وا نوض يا
واش الذوق اللي بسال؟
و لا الهزل:أصابه الهزال ؟
!ضحكوا لينا غ الأطفال
و محال
الضحك ثقالة
الضحك رسالة
ما توصلو غير حمامة زجالة
هايمة جوالة
توريك شكون وحل
و فين وحل
و تلمح للحل
لكل حالة
و ماشي من والى
ينز نوالة
هرني باش نضحك :
ما جد ما هزل: هاذيك مهزلة
و آنا غ ندير الكالة
واخا الكلام ما زال ما سالى
محمد حلوبي - آسفي