.....فين نلقاه ؟

كترات جراحي
وطال نواحي
قلت نشوف الطبيب
يمكن جرحي يطيب
حارو الاطبا من كترة الادوية
وكَاع الدوايات جربوها فيا
ما نفع مع جرحي دوا
قالو لي: عليك بالكوى
قلت: النار اللي فقلبي مطيّرا لشرار
واش النار كدّاوي النار؟
قالو لي: جرّب زيارة الاوليا
يمكن ضرّك يتخفّف شويّا
ايلا نتا درتي النية
قلت نجرّب
ويلا كان مرضي نفساني
يمكن نرتاح وما نبقا نعاني
زرت جميع الاوليا
لّي نعتوهم ليّا
لكن، الله الله
للضّر مرارة
ما دّاويها الزيارة
ولّيت كيف البوهالي
يّام وليالي
ندور ف الزناقي
نبرّح حتى بحاح حلقي
وعطشي ما رواه كَرّاب ولا ساقي
نصول ونجول
نّادي ونقول:
فين نلقى دوا لدايا يا لحباب؟
ضرت فكل قرية ومدينة
من باب ل باب
قالو لي دواك عند العشاب
مشيت عند العشاب
لّي جرّب كل ماعندو
حتى العود وسرغينة
والجاوي باش يبرّد لغبينة
وف التالي عطاني قرعة صفرا
وقال لي: هادي عشبة مقطّرة
جايا من قلب الصحرا
بيّتها سبع يّام ف السمرة
وشربها سبع يّام قطرة قطرة
ويمكن تبرا
درت براي العشاب
وجرحي ما طاب

لله يا هل الله
جيتكم قاصد
والمقصود الله
وجدات الصّابة
وكلشي حاصد
ولّي ليه شي دّاه
ورضى بالمكتوب
وانا دوايا ما لقيتو فعشوب
ولا هو وارد ف الكتوب
قولو لي يا صحاب لقلوب
فين نلقاه ؟؟؟

ـ سعاد فائزـ

12ـ05ـ24

لله يا هل الله
جيتكم قاصد
والمقصود الله
وجدات الصّابة
وكلشي حاصد
ولّي ليه شي دّاه
ورضى بالمكتوب
وانا دوايا ما لقيتو فعشوب
ولا هو وارد ف الكتوب
قولو لي يا صحاب لقلوب
فين نلقاه ؟؟؟

ـ سعاد فائزـ
اختي الفاضلة المبدعة سعاد فايز
قصيدة زجلية معبرة شكرالك
لك كل التقدير والاحترام

دام لك البوح الجميل
زجلية كاملة مكمولة
كلمة كلمة وزادها المعنى
تبارك الله عليك وفيتي المعنى
وعلى الفاهم يفهم ويأخذ العبرة
من زجالة وشاعرة كطوع الكلمة
زجلتك رائعة وإن كانت كلها آلام وشكوى وبحث عن الدواء بحيق عجز الطبيب والعشاب وكل من يدعي التطبيب
اللهم إنك عفو تحب العفو فاعفو عنا فأمراض هذا العصر متنوعة وكثيرة وخطيرة أيضا نسأل الله الدواء الشافي .