حُط السبع هز السبع

عطيني كريمة ولا راك ضبع.



كرايم الرموكات

في السماوات دارت علامات

والطاكسيات في الزناقي خلقوا الزحامات.



هنا طاحت لكريمة

وهنا ما نلعبوا عليها

طاحت لكريمة

نوضوا غوتوا عليها.



كلنا مغاربة وكلنا محتاجين

وللكريمات ما حنا طالبين.

يمشي زمان ويجي زمان

ولْريع لكريمات ما حنا طالبين

يمشي زمان ويجي زمان

وريع لكريمات يظهر ويبان

ما بغينا منّة ولا صدقة

بغينا غير حقنا

حُوتْـنا وخضرتنا

حوتنا ورملتنا

والشفّارة يطلعوا برّا.



ها العار

تظلمنا وفي حقنا تّكْلينا

نصفوا أولادنا وقسموا عليهم وعلينا.



إلى كان عقلي ينفعني

الكريمة مابقات تنفعني

حيث جات

وفي السماء دارت علامات

وفي كروش الحرام دارت غزوات

دارت فيرمات

ودارت ضيعات

ودارت الفرق كبير

بينك أنتَ وأنتِ وأنتَ وأنا.



المغرب ديالنا كلنا

وكلنا تنخدموه

غير كاين اللي تيخدمو بكتافو

وكاين اللي تيخدمو بعقلو

وكاين اللي تيخدمو بجوج صباعو

بيهم يحلب ضرعو

بيهم يخْْوَنْ زرعو

بيهم يقطع الواد

وبيهم ينشّفْ رجلو



نوضو يا الغافلين

يا المحكورين

يا التالفين

نوضو باراكا من النعاس

هزو البالة وهزو الفاس

ونقيو بلادكم من شوك الخوانة

حرثو بلادكم لا تبقاو ترّاسة

حيْحو على الجّوشْ والقُبّيْعْ

وَكّالين الزرع والزريعة

وماطيشة والدليليعة

نوضو هزّوا قْدَمْ وحطّوا قدم

وفضحو الشفارة فاضحو

فضحو الخوانة فاضحو

فضحو البزناسة فاضحو

فضحو الطّلابة فاضحو

فضحو العطّايا فاضحو.