حال الجدبه
ــــــــــــــــــــــــــــــ
المفضل الياموني
ـــــــــــــــــــــــــــــــــــــــــــــــ

خلوني نهبل نوسد هبالي..
رني عييت...

نشوفني
ك انا..نيت..

لا تسطرولي طريق..
لا تلقمولي بريق....
خليوني نموت عل خاطري..
نطلع مني شهيق

خليوني بخاطري نحط ثقالي..

خليوني نخرج من الضيق..
دمعه
خليوني فيا نفيق..
على شمعه
نشد رحالي
نشد راسي براسي..
نزوق كراسي..
بكانتي..نشوف اش جرالي
نشوف لي يليق..
خليوني نتصنت على ضلوعي..
ونطرز دموعي
على ثوب الحلمه..

انت يا الروح يلا فيك شي دغل
بياتنا بلية لحرف..
يلا كان فيك شي دغل

خليه ف الجوف
تصفى مني
تقلي فزيتي
وخرجي عسل من الشهد
دوا يداوي..
ماتسمع لريح لي تصوط
ولا لي دوا ولا لي هذ داوي
باش تعرفيني اش ناوي..
خرجيني ك انا ..
خرجيني صوره من خيال..
خرجيني دري من فم لهبال..
خرجيني مجدوب كلامه مساوي
خرجيني باللي ينفع
واخطيني من كلام لقهاوي..

كني قمر ضاوي
على كوني
نكونلك قطره
نسيل ف حلقي الناشف ريقه
نكله نجم ف السما..
عامي لنظار ببريقه

لا تغيب يالمالكاني
لا تغيب ياملات الفال
لا تغيب وتخليني ..
ياعيشة...تالف
بين الدهشه والرمشه
داخلت عليك بالعار

لا تخليني واحل ف الشفار
نتراكل والغربه تمسح رجليها فيا
لا تغيب يالساكنه فيا
يالمونساني
يالقابله على هبالي
يالمنسياني..
متخلينيش نتوحش راسي
نشتقني ونخرج مني
عرج
متخلنيش نخرج نتكور..
متخلنيش نخرج عور
بغتني نخرج
مخلط بيا
لذة
بغيت نكون مع الكاينين ولبدا
مقطر محبة من قلب
حنين
بغيت نشخض
نتحير على القعدا..
ونتمنظر ف الزين
بغيت نكون ف نهاري
حافض سواري
طالب مصفي السلكه
ناضي..
مستف سراري
دافن سري
لخويا وجاري
لعدويا ولي قرا
وللي ما قاري
بغيت نخرج نور من صور
روح ف سماها تدور
بغيت نزهق مني معايا
نبقى
ماتعريني رياح لوقات
مايدوخني زين لبنات
صامد جبل
قدامي فغرق التراب
وروحي فقلوب لحباب

هموم ومحان
الحال محتاج ليك..
ياملات الزين..
الحال محتاج ليك

تهرق وديان
تسيل ف قلوب لحباب والعديان

لا تغيب
عليا ويلا غبتي شوري معايا
وقولي لي فين نجيك..

نجيك.
المفضل الياموني

هذا مااعرفه عن ابراهيم الرامي ..يحلم بالجمال والسموا كما نحلم جميعا وكما يحلم الكثير هنا من شعرائنا الابرار والذين اقدرهم وانحني لهم انحناة تقدير لتحملهم وغيرتهم على الابداع ...

اعرفك اخي ابراهيم عاشق لكل ماهو جميل...وغارق في الحلم ..هذا ما عرفته على ابراهيم الرامي طيلة علاقتي بك كصديق...
الاعتراف بكل ما هو جميل بكل اخلاص للابداع هو خدمة نافعة للابداع......
اعرفك يااخي ابراهيم زجالا وبشهادة الكبار...ولك تجربة طويلة في الميدان.....
كل الاشجار قد تتعرض لهبوب الرياح لكن هناك من اصناف الاشجار من تقسمها الرياح وهناك من تقاوم العواصف...
شكرا لك لانك بصفة الصنف الثاني وشكرا على روحك الطيبة....واخلاقك النبيلة.....