بعد سماع قصيدة (حكايتي مع وحيدة )ليلة الإحتفاء بالمبدع قامت ابنة اختي
الشيماء الإدريسي التي كانت بصحبتي في الحفل بكتابة رد بعنوان (قصتي مع واحد)
وذلك في طريق عودتنا بالقطار وقد ارتأيت ان انشر القصيدتين معا لمتعة القارئ
وارجو الا اكون قد اثقلت.


آجِيوْ تسمعو

حكايتي مع وحيدة

حكايتي حكاية
نعاودها ليكم بحال لحجاية
كنت غادي فطريقي
ماعِليّا ما بِيّا
حتى شفت وحيدة
فالزين فريدة
كتهز عوينة
وتحط عوينة
تلَفَّتْ ليمينها
تلَفَّتْ لشمالها
ما كاين معاها
لا رفيقة ولا رفيق
تمَعّنْتْ فيدِّيها
ما فيها خاتم زواج
ماشية بخطوة رزينة
ما كتمايل ما كتعواج
القَدّ مرشوق
والشعر طويل
كحل كيف الليل
ومجموع ماشي مطلوق
المشية حمامة طايرة
فوق الأرض مرفوعة
ولخَلفة ساقرة
ماشي مسموعة
قلت مع بالي
هادي هي لّي تعجب لوالدة
ونقدر نبني معاها
حياة سعيدة
قربت منها
قلت نكلمها
''عافاك أختي
ممكن نتعرفو؟

إلى سمحتي''
''إيه تفضّل
ما كاين مشكل''
قلت '' نمشيو لقهيوة
نكٌلسو ونتكلمو
كيف الناس''
قالت ''يالله ما فيها باس''
قلت ''ختاري لمكان''
قالت ''ماعارفاش, ختار نتا''
وهادا ما كان
قلت ''أنا سميتي عدنان''
قالت ''وانا حنان''
مشينا, كٌلسنا فلاطيراس
جا لكٌارصون
قالت: ''أهلا خويا عبّاس''
قال: ''مرحبا ختي حنان''
''آش تشربو ؟''
قلت: '' أنا قهوة مهرسة''
قالتلو: ''وانا بحال ديما''
قلت: ''تبارك الله عليك
هي مولفة تجي لهنا ديما ''
قالت: ''لا غير ليوما''
قلت: ''ولكن لكٌارسون كيعرفك"
قالت: ''لا, هاداك راه ولد الحومة"
جابلي قهوتي لمهرسة
وجاب ليها قهوة كحلة
ومعاها باكية دمارلبورو
شعلات كٌارو وبوّخات
وقالت: "دابا عاد لهدرة تحلى
وأرا سيدي ما نهدرو,
هاك خود ليك واحد"
قلت: "أنا مكنكميش"
قالت: "حْسنْ ليك
لا دخان ولا حشيش
باش تقدر تربِّي الريش"

قلت لراسي
ما ندير والو فلبال
يمكن عندها مشاكل
وهي لِّي وصّلاَتها لهاد لحال
هدرنا, تكلمنا
حتى دارت الستة دلعشية
قلت: ''نمشيو؟"
قالت: "بلاتي شوية
يالله بدات لعشية"
نضنا, تمشينا
درنا كل الشوارع
حتى طابو رجلينا
دارت التمنية و خمسة وربعين دقيقة
قلت: "نمشيو, دابا تعطلي على داركم"
قالت: "لا, غير تهنّا
راني هدرت مع ماما"
قلت: "آش قلتي ليها؟"
جاوبتني: " قلتلها غادية للسينما"

قلت مع بالي
وقتاش دارت هاد لمكالمة؟
وانا ما فارقتها حتى دقيقة
إيه يا عدنان
آش هادشي فاش طحتي؟

قلت: "مشا لحال
مانمشيوش للسينما"
قالت: "ياك ما خفتي؟"
قلت: "لا, مناش غادي نخاف بعدا؟"
قالت: "زيد دغيا
راه قريب لفيلم يبدا"
مشينا للسينما
شريت فيدي قرعة دلما
دخلنا, طلعنا لفوق
زادت معانا بنت توصلنا
لبلايصنا
قالتلها: "أهلا حنان"
قالت: "أهلا أسما"
قالتلها: "ياك ما بغيتي شي حاجة أختي حنان؟"
جاوبتها: "إيّه أختي أسما
بحال ديما"
قلت: "هي مولفة كتجي لهنا ديما"
قالت، "لا,عاد ليوما"
قلت: "كيفاش عرفاتك وعرفتيها؟"
قالت:" لا, هاديك راها بنت الحومة"
دازت ربع ساعة
وها أسما جايّا
ومعاها رباعة
ها لولاد
وها لبنات
كل واحد منهم
فيدّو قرعة
دارو بينا
كٌلسو
وشعلو اجّوانات
قالت: "خود ليك واحد
يكٌاد ليك لمجاج"
قلت: "لا, أنا خارج نشم لهوا
راه عماني هاد لعجاج"

خرجت لبرّا
وبقيت نخمّم
قلت لراسي:
إيه يا عدنان
آش جرا؟
وشنو لّي طيّحك
فهاد لحفرة؟
خلّيني هنا نتخبّا
ونشوف آش غادي يجرا
فرّقات السينما
خرجو الناس
رباعات رباعات
وها حنان جايّا مع رباعتها
فوسط لولاد ولبنات
هادو محششين
وهادو سكرانات
دخلو لابسين سراول طوال
خرجو بصايات قصارات

قلت لراسي
إيه يا عدنان
فلت بجلدك
حسن ما تصبح ندمان
راه بحال هاد خيتي
عمّرها ما تكون ليك حبيبة
خدعاتك فلَّوّل
بلمشية والتجبيدة
وفالتالي بغات طَّيّحَك فلمصيدة
حمد الله يا عدنان
لّي بيّن ليك عيبها
ورجع عند لوالدة
فوز برضاها
وشوف ليك بنت الناس
تبرّ بيك وبيها
تبني معاها أسرة على أساس


وهادي هي حكايتي
مع وحيدة
فالزين فريدة
مجبّدة تجبيدة
غادية حادرا عينيها
كتهز وحيدة
وتحط وحيدة
والله وحدو عالم
آش مخبيا
فلمزِِِيــوِِيدا...


-- سعاد فائز--

رد الشيماء الإدريسي


قصتي مع واحد


نعاود ليكم
قصتي مع واحد
جا ل المعقول و الزواج قاصد
قال خصو غي العدول
و جوج فبلاصت شاهد

درت النية
وقلت نعرفو ومالها
يمكن معاه نبني حياتي
ونجاهد

داز شهر, عام, عاماين
شحال قدني نعاود
خونا هاز فشكارتو
فبلاصت الفايد
غي لمزاود
هادي حارة
وهادي حلوّة
وهادي على ماكلتها ما نقدّ

تسنيت هاد المعقول
ما نفع معاه
لا ورد
لا عكار فاسي
لا كحول بالمرود
لا شوافة
لا فقيه للقلم من سنين رافد

تيليفونو كيصوني ويعاود
هادا سعيد
هادا ابراهيم
هادا عبد الواحد

مرة اجتماع
مرة كٌنازة
ديما ل همّ صحابو رافد
احسابو أنا فدار غفلون
ديما يجيني بكدبة فلون
و انا غي كندوّز ونهاود

داز عمر بسنين يتقاس
و الشيب شعل بيه الراس
وأنا حاسبني ليه مخدة او مزود
وسط عرّام د لمزاود

يا راسي فيق مل الكٌلبة
وباراكا من القرافد
الحب و الغرام
لي تسنيتي
دخل فقلبك سفافد

إيوا كيقولو القلب الكبير
ما يصلاح غي بولفاف
إيوا وجّدو شي مجمر
ولكن يكون زاند

- الشيماء الإدريسي



11-10-09

شكرالك أختي الفاضلة المبدعة سعاد فايز على هذه المساجلة المعبرة بينك وبين الاخت الكريمة الاستاذة شيماء الادريسي والتي شرفتنا بحظورها في ليلة الاحتفاء بالمبدع
بإنتظار ابداعاتكم القادمة
لكم مني كل الود والاحترام

هنا أختي سعاد فايز توتقين بهذه الزجليات ما نعيشه في مجتمعنا وهذا هو الجميل اتمنى لك مزيدا من الابداع

تحياتي