حروف إلهام بُصَفا اشكون أنا فيَ...؟َ

اشكون أنا فيَ…؟َ

اشكون أنا فيَ…؟َ

….

واش أنا هي… اللّي كانت فيَ…؟َ

واللاّ أنا جديدة عليَ…؟َ
واش كانعرفني…؟َ
واللاّ واللّيت غريبة عليَ
يمكن أنا اللّي كانت
و أنا اللّي واللّيت
و أنا اللّي جايّا حتى هيَ
خفت من أنا اللّي جايّا
تمسح أنا اللّي فيَ
و يبقى السؤال امْعلق فيَ

…

اشكون أنا فيَ…؟َ
…

أنا ذيك النقطة
اللي ما عليها حكام
تعزل الحرف اللي ابْغات
تخرج منّو بالسكات
و تختم القصة اللي ابْدات
سولُوا النقطة… تحكي لكم عليَ

اشكون أنا فيَ…؟َ
…
أنا ذيك الهمزة
اللي تلعب ب لَحروف
طالعة نازلة
معذبة الليف و اليا
حتى كثروا لَهموز الحامضة
عاد حدرت الراس
و تركنت احْدا قبر اليَ.. “ئ
…

زحام الخاوي
…

اخْويت راسي ف جيبي
و قلت فين هو عيبي
الجيب اعْمر
و الراس اخوا ليه لَمجر
اتبع لَخوا قُدّامي
و نهار وحل كلامي
ما قدر يخرجو جيبي
و ما سترني من عيبي
ملّي بغيت انعمّر راسي الخاوي
ما نفعني بخور ولا جاوي
خاصني نعمرْ… هم
و يطلع ليَ الدم
و يضربوني الجنون اللّي فيَ
و يفيْقُوا ذاتي ليَ
نتفششششششش
شششششش
و نخوا من لخوا
العامر بيَ
….

الْعب و كُول
…
لعبت جميع الأدوار
و دوري ما عرفت منين نبداه
يمكن ما بغيتش انْلعبو
يمكن خفت انْلعبو
و بديت نلعب نلعب… عليه
حتى اتْقاضى اللعب
و من بعد اللعب
تمّا اللّعبة
…
الراس… أرض
و الأرض… راس
اللّي ف الرّاس ف الأرض
و اللّي ف الأرض ف الراس
بين الأرض و الراس… شمس
الأرض تدور عليها
و الراس غضبان عليها
قدّامو… و ما حاس بيها
الأرض تدور على الشمس
و الراس يدور على طرف الخبز
امْدَفياه و ما حاس بيها
امْغذياه و يبكي عليها
يدور…يدور
و يقلّب عليها
يشبع منها و يرميها
و نهار يكبر
يقول…هي اللي تدور عليه
و هي اللي ما تقدر تعيش بلا بيه
أناني بطبعو
ما يبغي حد يفهم عليه
الشمس هي اللي تدور عليه

ماشي هو اللّي يدور عليها

أستاذ العزيز سعيد محمودي ،قد استمعت
لهذه القصيدة الزجلية الرائعة وتمعنت جيدا
في حكمة الكلمات والمعاني،أحسنت أيها
المبدع الرقي.