جنة نار لعشق لكٌادي


فجنة نار لعشق لكٌادي
نصبت خيامي
ودكٌيت وتادي
دفنت حفادي
ونعيت ولادي
وكل من مر بساحتي
يقول: شكون هادي؟,

,
هادي لّي بات قلبها مغدور
وصبح دمها مهدور
هادي لّي كانت عالحب دُُّور
وصبحات فقبّة الهمّ تزور
تشعل شموع
وتطلق بخور
حتى تهموها بالشعودة والسحور,,


حرام عليكم يا ناس
علاش بغيتوها
بالرجلين تنداس؟
ياك غطّات الراس
وهجرات مجامع الناس
وولاّت تتكلّم غير بلقياس
لعلا وعاسا قفّة الهم اتّساس
ويعيشو وليدات لعراس
وما يموتو مّاواتهم فالنفاس,,


قولولها تهجر ساحة لعشق
لّي ولاّت نابتة فيها
كيف لعسّاس
راه عضامها
لّي ولاّت اتّساس
وعينيها
هادا قرن ما شافو النعاس
شوفو كيف ولاّت
حكاية فلبلاد
من نهار نزلات
بساحة لعشق
ودكٌات لوتاد
عضامها صبحات عواد
وقيدة وحدة تشعلها
ويصبح كلشي رماد,

,
مالكم يا سيادي؟
آش بغيتو عندي؟
ياك خلّيتكم في حالكم؟
خلّيوْني في حالي
ياك الرماد رمادي؟
ويلا طاح فجنة نار لعشق لكٌادي
يكون هاداك سعدي
ومرادي
باش نلقى حفادي
ونعانق ولادي
لّي ما شافتهم عيني
ولا لمساتهم يدي
ولا نوّرو بالفرح عيادي
يمكن غدّا نفخر بيهم بين جدادي
فجنة نار لعشق لكٌادي

ــ سعاد فائز ــ
11-09-07
16h

في جنة نار لعشق لكادي - نصبت خيامي- ودكيت وتادي- واستمتعت بالحرف الموزون ياسيادي
شكرا أختي سعاد فايز

العزيزة سعاد فايز بوح جميل وصور رائعة دام نبض قلمك الجياش جميل الله

توقف تفكيري فلم ألقى ما أعبر به فلك التيحية وكل الثناء


التلميذ : طارق أمغار

أبدعت وصدقت أختي سعاد فايز
كلام الناس جْمَرْ وطشاش، نارهم
تكوي بلا حطب ولا خشاش ليهم
الله للي ما يغمض رماش.