عشق النسوان
لحجر كان حجر صوّان
حجر صلب ويلمع كيف لمرايا
طافت بيه نسوان
ليها من الجمال آية
انطق لحجر وصاح
شوفو عيون لغزلان
جايّا تحوم حدايا
طيّحات النسوان
النقاب لمسدود
وكشفات على تفّاح لخدود
و جْفان مفتحة ورود
وفْواه مرسومة كيف لعنقود
اتّبهر لحجر من نور لجمال
وبغا يسمَّع صوتو
لكن محال
صوتو مشا
مع عيون بْهْراتو
و ريحة لياسمين
من جهدها خنقاتو
راح صوتو
وضاعت كليماتو
من نار لعشق لّي كواتو
رقصات النسوان وغنّات
وصواتها بالضحك علات
ولحجر الصوان
مخنوق مسكين
راح يجود بصوت حنين
يخرّج بيه ميات أْنين وأْنين
وضلوعو من ضيقها تفرّكات
وحبّاتو من شدّة صراخو تفكّكات
لكن شكون يسمع صوتو
وسط الضحكات ؟
وشكون يحس بأنّاتو
وسط النغمات ؟
نار لعشق فقلبو حرقاتو
وبلهيبها دوّباتو
ضارت بيه لوردات
وبرحيقها سقاتو
داب لحجر الصّوّان فلحين
ومن عشقو لنّسا صبح طين
خداتو النسوان وفرّقاتو
وبيديها عجناتو
وشكّلاتو
وبلوانها الزاهية لوّناتو
شوفو لحجر الرنّان
ما بقا ليه صوت
صبح تحف من طين
تدور فلبيوت
تزيّن قنوت وقنوت
من عشقو لنّسا صبَح مكبوت
كامي همّو فقلبو
ويبكي من غير صوت
من عشقو لنّسا
مستعد ميات مرة يموت
لكن يضلّ مزيّن لبيوت
باش يشوف عيون لغزلان
لّي حوّلاتو لطين
بعد مّا كان نشوان
ويفخر بكونو حجر صوّان
صار يقول
دوام لحال من المحال
وفعشق النسا
تخلّط لحرام مع لحلال
عشق النسا عزيز وغالي
يتّوزن بميات متقال ومتقال
عشق النسا ورود
كل يوم تزيد طراوة
عشق النسا مرّ
ومرارتو تزيدو حلاوة
عشقهم حنين
ومن رقّتو يهدّ لجبال
يحوّل حجر الصقيل
لصلصال
قطرة دلما
تدوّبو فلحال
وبعشق النسا
دوام لحال
من لمحال
هادي يا ناس
قصة لحجر الصّوّان
لّي صبحات حكاية
من حكايات الزمان
تبدا بقولة
كان ياما كان
كان فيوم من ليام حجر صوّان
صلبب يلمع ويجود
بصوت رنّان
يغني وينشد
وهو نشوان
ومن يوم وقع فحب النسوان
صار طين
يدور فكل مكان
يتحوّل ويتلوّن بكل لوان
يتركّن فلقنوت
يزيّن لبيوت
باش يحضا بنضرة
من عيون لغزلان
ويتمرمد فلغبرة
باش يحسّ بيدّين النسوان
لّي تزوّل لغبرة
بلمسة حنان
يخلّط غبارو بدموعو
باش يطول التنضيف
واتْرمّم ضلوعو
بلمسة لجنس اللطيف
هادي يا إخوان
حكاية لحجر الصّوّان
لّي وقع فعشق النسوان
وكيف ما قال
بعشق النسا
دوام لحال ملمحال
فعشق النسا
شحال تقال وتقال
وفعشق النسا
ماشي كلشي ممكن يتقال
ــ سعاد فائز ــ
الرئيسية
موضوع: عشق النسوان 
الخميس 8 سبتمبر - 1:25
