يا خليلي السحاب غطا
و عيني ما بقات تشوف
لعقل هبل تسطا
لا عاد حلف بحلوف
نقدني راني ف ورطة
ها حالي راك تشوف
محزم ب خيط ماشي بسمطة
بحال الطير ريشي منتوف
ها الحزمة وباش تربطها
ها الذراع وفين لكفوف
الزلط زادني زطلة
ميزاني عوج ماقيه صروف
وقف عند النقطة
تامل ثرا لحروف
مابنيت حيط مازرعت كرمة
ماكسبت غنم نغزل منها صوف
الهم تعرم وعلي ترما
ها الغابر وها المكشوف
يا صاح الحال ظلمة
شدتني رعشة من كثرة الخوف
مرضت سكنتني حمة
شوف حالي وليت مسكوف
يا خليلي قول كلمة
رشدني دير معروف