محمد بوبكر كتب:

نبدا كلامي فالحين...برب العالمين
فكل لحضه والحين ..يدكروه العاقلين
حيت الدنيا بلا دين...كيف لحماق بالزين
تصيب عقلها فين....مابين المخبولين
والدنيا بلا حشمه....كي الحوت لي بلا ما
نتخبطو في لعما.....راحنا مجليين
ماكاين والو تمّ.... مانقرّو بالنعمه
غاديين في ظلمه....راحنا معميين
حتى الساعه طلاّت..شوفو كي تعرّات
حتى البغله ولدات...مابين المنسيين
تلتلهّينا بالفتات ....حتى خصرات لبنات
شحال تقيّل وتبات..مابين الملعونين
ياويلو ل علاّي....بايع شهوى شرّاي
منين خلقتي ولاّي..ياك غير الما والطين
وزعمة علاش تسهاي..قوليلي يا قليلتْ الراي
عجباتك ديك لاطاي...وماينفعش الزين
مايحيّد قدار...مايطفيش النار
الدمع واخّ حار...مايخلّصش الدين
شحال درتي العار..وربي عالم لسرار
كي الديري فالنار...ياويل المحروقين
العالامات بانو...خيارها لي هانو
قالوها لي كانو...ياويل الغافلين
الله يحسن فعوانو...لي كان عدوه لسانو
خصّو يعضّو بسنانو..خاصّو يلا يكون رزين
المنكر ولّ عادي...في ديك الأرض وهادي
كي ولاّت بلادي...وحنايا المسؤولين
فين يا ودّي غغادي ..مالك تايه وتدادي
كانو قالوها جدادي...القوم الصالحين
ولاّت غابه بكلاب...يغدرو فيها لحباب
فين السبع يتصاب...غيابو طال سنين
عايشينها بضباب...معديينها بعداب
لا تقولو مكتاب....وحنايا المسؤولين
سعدو لي كان غريب..عيشو تمرة وحليب
لاطالب والطبيب...غير رب العالمين
لا تدّي وتجيب ....لا تغدر لحبيب
إلى بغاتك بسبيب...من خير الرازقين
ولّي مهنّي مرتاح ...لي على النفس يقساح
لاخر عقلو طاح...راه يففكر بالشين
فين غادي تتلاح...مالك تمشي نبّاح
لعمر بوالو راح...راك بين المعميين
حتى الصالة تنساها..ياودّي كيف تلقاها
قالك لي كان بغاها تحفضو بجوج يدين
لا تزيدها فعماها...ماتجرّك معاها
النفس الصوم دواها..وعشرةْ الصالحين
راه دايرها كحله...راه دايرها زحله
جاب لراسو لبله...عشرةْ الجاهلين
والموت تجي غفله..ياويلو لي يتفلّه
يجبر راسو فخله...ويقولو زادو فين
خلّيتي لقرآن...وراك تتبع للحان
غدّ يقولو كان...راه بين المدفونين
ما تنفعك لحزان..ولّ دمعةْ لعيان
كنتي فيها عيّان...كنتي من الغافلين
كي تقول لمولاك..مالك زايد فعماك
شوف الطين غطّاك..وجاوك المالكين
آش تاخد لحداك...فين حمرتْ لحناك
لاش هواك دّاك...ياك جاوك المرسلين
جمع فالحسنات ...يتمسحو السيئات
الجاريه لي بقات...من بعد الراحلين
وخودلك شي ركعات..وبدموعك تبات
ينفعوك شي دعوات...والرض دالوالدين
شكون فيها دايم...فهم انت يا الفاهم
لاش تبقى هايم...سعدات التائبين
سبحان الله العالم..سبحان الحي الدايم
وبالصلاة مداوم..على خير المرسلين

كل التوفيق لك أخي وأستاذي المحبوب محمد بوبكر انك تثبت في كل محاولة شعرية ابداعية
جديدة انك صاحب موهبة تستحق التقدير
استمتعت بالقصيدة الرائعة تستحق القراءة أكثر من مرة
بارك الله فيك اخي على الجهد الواضح والمتواصل

اخى العزيز محمد بوبكر اشكرك على هذه الزجلية الرمضانية الرائعة و المفيدة جدا
فهي فى نظرى درس من الدروس الرمضانية التي تلقى فى المساجد
تنبه الغافلين و تحذر النائمين الذين هم بعيدين كل البعد عن دينهم
رمضان كريم

محمد منار

زجلية هادفة اخي محمد بوبكر..

تقبل مروري الخاطف..

ورمضان كريم وكل عام وانت بالف خير...

تبارك الله لك هذه القصيدة الرائعة العميقة
الإحساس تنبع من قلب خاشع وصادق.
أتمنى لك صديقي محمد بوبكر كل التقدم والرقي.