وللقصيدة الزجلية كلمة في مشروع النقسيم الجهوي الذي أثار حفيظة أهل تافيلالت

يلا همك حالي
ديري السبة بحصلابان
والكافور والريحــــــان
وميعادنا درب العطـــار
نحكي لك
على ما جرى وطرى لي
فزمان حالو ما يخفاك
يا لالة عروس الــدوار
سوكي وكحلي عويناتك
واجي وهدينــي وذيناتك
ويلا بكيب عذريني
سيدي ربــي عالــم
مـال قلبــي محتـــار
***
أنا اللي سولت شلى من هواوي
علــــى هــاد التقسيم الجــهـوي
وحال واحتنا يا حضار
ﯕالوا لي
حمار الشيخ
ما ناض ما ناض
وزادوه قنطار
***
واحتنا يا واحتنا
يا اللي فيها راحتنا
يا الغارقة فشر لبحار
ظلموك ألالة
وكذبوا عليك
كذبة مكرمة
فعز النهار القهار
ألف تخميمة وتخميمة
ولا ضربة بالمقص
ردموها حية
ما بين شلى حجار
***
ﯕالوا درعة تافيلالت
حسبونا ناعسين
على وذنينا
ما سا يقين خبار
وحنا شحال قاسينا وعانينا
وكحال السعد بدى فينا
وشربنا المرار
سالوا عسو بسلام
سالوا زايد وحماد
سالوا الطلبة لخيار
يا ما داز علينا فالزنازن
أبريا بالصدمة ولاوا زنازن
وشكون شكون
يجبر هاد الاضرار
فين حقنا فالمعادن
فين نصيبنا فالمخازن
واللي نبت فينا
فرفر وطار
بيوض
حفار قبور النخل
ما خلى تمرة
ما خلى جمار
الفلاحة فبيت الراحة
يا المغرور بالسياحة
والشبان سال عليهم
ورقة الكار
***
ﯕالوا درعة تافيلالت
وتافيلالت بالكفة
ودرعة بالطارة
طلابات من دار لدار
قلة الوالي
والجيب الخالي
واللي بداتوا العلايل
كملوا تقسيم العار
***
نبكي وعلاش ما نبكي
على ما داروا فينا الكبار
والناس ساكة
غير اللي هدى ربي
وﯕال هذا عار هذا عار
تافيلالت بلادي
وبلاد اجدادي
ماشي من جا يجرب
ويقول هذا فار
***
وحلة هذي واشمن وحلة
فاش حنا
وأنت فين غادي بينا
تعالى ياودي تعالى
تعالى نعاودوا لعبار
أنت قولي علاش بنيت
وأنا سمعني وفهمني
ويلا خطيت
كري على ودي ﯕزار
يقطعني طروف طروف
بحالي بحال خروف
ويشويني فوﯓ النار
قابل قابل
وعلاش لا
غير قيل عليك بلادي
بلاد الشرفا الاحرار

الغالي والعزيز الاستاذ عمر حمداوي سعيد بالقراءة لك أخي استمتعت بهذه القصيدة المعبرة بصدق
تألق ورقي دائم انشاء الله
ننتظر منك اخي المزيد

شكرا أخي وأستاذي سعيد على مرورك البهي كلماتكم وقود باخرتنا في بحر الزجل الجميل دامت لك المسرات والأفراح

الزجال عمر الحمداوي

مرحبا بيا عندك في هذا الصرح الثقافي.

نتمنى ان نستمتع معا..بأبداع راقي...

اتمنى لك التوفيق...في ايصال رسالتك في افضل الضروف..

شكرا لك سيدي إبراهيم
سعيد بمرورك الجميل
وكلماتك في حق قصيدة
جادت بها قريحتنا ردا على تقسيم لا يخدمنا

أخي المفضل مبروك عليك هذه المهمة
ووفقك الله لخدمة القصيدة الزجلية
التي تنادي بأعلى صوتها الرجال الأقحاح
والغيورين على هذا اللون الإبداعي المتميز جدا جدا
ومرحبا بي عندك