طربوش الحية

***

هرق دمي من لحمي


سال من لمحال

هازني الما

لقيت روحي فوق حروفي

ساكن خوفي

هارب

من الوحدة


نية

زماني فايتني ب مياة عام


ولا اكثر



انا مازال ماخلقت ب شهر

الشيب

فراسي ينقر

الحال مخنشش

عوال ينبش


عطيتو عيني

اعطاني صباعوا

اعطيتو قلبي

اعطاني وجاعوا


الباز يفقص الباز


الدباز دباز

دقو بالمطرقة ولا بالمهراز


ندمت علاش خرجت للريح

رجعت بحالي لصغري

لقيت عنصر

مالقيت واد لي يوصله

للبحر

نقرى عليه اشعاري

نحكي له اسراري

نخليه لجاري

سايل

حتى يشربوه الدراري


لي كال

حر ف الما

قرش ف لبحر

لي كال حر ف السما

بازونسر


لي كال حر ف الكتبة

ايوا يكر

التنهيدة لذيذة

ماقلناش لا

فين هي الفيذة من لكلام


شلا

نشوة الهدرة ماتشبع الدات

نعطيكم لي جاي

اعطيوني لي فات

نعطيكم لي حي


اعطيوني لي مات


الزاوية ف راس الجبل

وانا زايد ونهبل

رجليا

رزمو

وحملي يزيد يثقل


بغيت نشم رماد النجوم

طلاتني يامي بالحموم

خنقتني دوك لغيوم

لمكالية ريحي

الحابسة اعجاجي

لمخربقة مجاجي

لجمدة بحري

ومواجي

رني ندور ف بلاصتي

ك زوبعة ف هوايا

نحرك غباري

نشطب ارض خيالي

نجبد وحدي عباري

بيدي

نخلط دوايا

على قد الشوف

على قد الخوف

ماشي ف غدا

متلوف


دخلت على كانتي

بشراع الما

ودموع الحلمة

وصداع الدري

الساكن معايا

من صغري

فين هي لمرايا

يالفاهمني

يالرافد لفهامة

يلا صبح الما

تولي عليك

بالندامة

قال لي معايا:

لي بغيتها خليتها ورايا

قال لي حدايا:

لا تصدق الحجايا

حالة الما حالتها
حالة

وحالة العز

مدبالة

لفقي مور الباب
دفع الباب يبانو السطولا

وفركي ضلوعك

يالهجالة

وذاك الساعة عيط عل الغياطة

وعل الطبالة

لي كال فهمني

نعطيه دماغي

نعطيه يد مهرازي

يهرس قشور الكلمة

يعرفني اشنو

باغي

قالو:

كل اللحم بدمو

لا تاكل الحوت بسمو

العميان يكود لبصير

للجامع للكبير

سلاس

بجوج طاحو ف بير

انا عاطيها للشوفان

يبان ما يبان

رافد سلاحي

وحاضي الطرقان

مانقد نهضر

خايف من الغاشي

مونس الصبر

الوقت مزروب

ماشي

رافد سيف المنكر

بنادم معاه يقاسي

كايتسنى لفجر

القبلة فين ماعطيت

راسي

نطلب السماحة من الما

ونستغفر

هذا مكتوبي

هذا مالقيت ف كراسي

هذا ما خلاو عشاق لكراسي

الثقافة

مكركبة

مدردبة

مكورة

ف الحافة

معنصر عليها

التلاف والتلافة

عاونو الفرقة

كوات قلبي

مرضت المعدة

بالحرقة

كل لاعاب رافد صينية

وزلافة

ايوا نرجع نتلوى فراسي

نوسد خيالي

ونبقى حاضي

يلا تخصمت مع راسي

عند الصلح مانحتاج

لقاضي

مرة مرة نسافر مع الكشافة....

المفضل الياموني 2011/27/1

تحيتي لك أخي وأستاذي العزيز المفضل الياموني
استمتعت بهذه القصيدة دات المعاني العميقة
لك أجمل التحيات ومزيدا من العطاء والتألق

شكرا عزيزي سعيد على مرورك الطيب ايها الطيب

لك محبتي الدائمة...

الجليلة اسماء

يسعدني ان تقرا كلامي ويسعدني اكثر عندما تقرأ دموع كبريائي.

اتمنى ان تجدي نفسك في هذه القصيدة المتواضعة....

اتمنى لك التميز والتألق ايتها المبدعة المخلصة ..

اتمنى لك النجاح في كل محطات حياتك.

دمت بهية للحروف منيرة..

استمتعت بهذا الشلال الزجلي
دمت استاذي الفاضل المفضل الياموني مبدعا للكلمة والحرف .
تحياتي

امينة منيب

العزيزة جدا علي

مرورك احتفل به

الله يحفظك من كل بلاء.

أمين يارب العالمين
اللهم احفظ جميع المسلمين و يديم المحبة والاخوة في الله

الزجال والانسان

ابراهيم الرامي الذي اعزه جدا واحترمه كثيرا

وجودك بجانب حروفي الدائم له نشوة خاصة ..

اشكرك على ماتفعل ...