سألتك لله يا بنت لحلال
يا السمرا يا ضو عياني
واش قلبك رطاب أومال
او غير كعاجبك هبالي
**
تعالي تسمعي يا الڭمرة
نزلي من ذاك السورالعالي
نحكي ليك شلا هضرة
و ف غيابك أش جرى لي
**
عييت من الجري وراك
عييت من بعدك وجفاك
يا ما شكيت للزمان غرامك
ضحكني بكاني
ما وصلت نفتل خيوط رسامك
ولا انت قادرة ..
تفكي عقدة لساني
**
أجي نحكيو نطرزو لوفا
من خيوط لحرير وسطور الصفا
اليد ف اليد و الطريق وحدة
نبدعو كلام
نشدو ف الحرفة
نقطف ليك حروف
من جنان لهوى
تبرد ليك الجوف
وتكون ليك دوا
نفكو لعقايد عقدة عقدة
تبرا لجراح تزول الغدة
نفتلو ليام من صوف المحبة
نتلذذو لغرام حبة حبة
**
ويلا كتاب وغاب خيالي
تلقايني فوق سطوري كنرتاح
نصرف الجهد حروف ومعاني
يمكن هاذ القلب يبرا ويصحاح