قصيدة عن الملحون
عبدالعلي فيلالي بلحاج

اللازمة

يـا الوالـع بـفن الملحون شد عزمك لعزمـي ..................عنـايتـي هذي بين قرانـي وزن ومعنـى

القسم الاول

انـا الذي قـالـوا موزون ثم اخـتلفـوا فـاسـمي ...................كـلها منهـوم كي سمانـي من كم سنـة

انـا الـذي تبليت بلمحون ولست نـدري جـرمـي..................زمـانـي بالتجديد رمانـي راد لـي نفنـا

كنت عند حفاظي مسجون كلهـا لكنـوزي يكمـي ...................ما تبـان لـفـاظـي ومعـاني غير بلعنـا

لبارح كنت سيد لفنـون وليوم يـا ويحي مـرمـي...................صرت عند نـاسي بـرانـي محزون ومضنا
القسم الثاني

انـا الـذي قالوا موزون وشكون يفك لـي صرمي ..................فصيح ورادو تسكاني ويـن رامـو رمـنـا

يـاك خلدني ا بن خلدون فلفنـون رسخ لـي كدمي ...................ولعـاشـق تـغنـى بلساني وظفر بلمنى

مطاوع فالتقوى ولـمجون نافـد للمرمـى سهـمي ......................فكل كـنانـة تلـقـانـي و لله الـمنـة

فكل موطن لازم نكون حـد سيـوفـي تـدمـي .......................فكل مقـصد الشاعـر دوانـي وتهلا وعنـا
القسم الثالث

انـا الـذي قالوا موزون كنـز لـمحاسن فمـي ........................بـديـع ولفـاظ ومعانـي طرب ومغنى

كان فلـورى يتسمىميمون من تيسر لـو نظمـي .......................ومدح المـاحي رفع شانـي ذكر وغـنـا

سال من كان بالحـا مفتون يالـي نويتـي ظلمـي .......................سال بنعلي السنـاني بـالـحنش تكنـى

سال العلمي أش نكون يوم قال يـاهلـي رصمـي .......................بالتقوى غطاني وكساني فنظـامـو خدنـا
القسم الرابع

شوف وصف الخـد والعتنون يـالـي لحظـو معمي ......................عاشقي بـالـموهوب سماني عطـا ربـنـا

سال الذي بالـهوى مجنون من بكاه دمعـو يـعمـي .......................بكـا نـاس الحب وبكانـي عطف ومحنـة

سال داك الظليم عن السكون والصباح بضيـو يـرمي ..................والصهبـا تنـيم لعيـاني تلوح فلوجـنـة

سال لهـلال وهو عرجون يـالي دار نفسـو خصمـي .......................سال الغيم الفـوقـاني والبرق ليه سنـا

سال التـولالـي مع كنـون يـالي نويتـي عدمـي .......................ولشياخ لقـاصي والـدانـي ناس المعنى

العايـش ولـذي مدفـون كلـهوم حـملو هـمي .........................ملي مولانا تـلاني ضحات لفصاحة لكنة

فلالاه حسن المضنون ايـلا يريـد يجـبـر عضمـي ...................ويهيـئ لـي من يهوانـي خير وحسنـة

يا راوي الدر المـصيون منقوش عليه اسـمي ..........................فيلالي ايـلا ربـي خلاني نجدد المبـنى

مهمـا قالوا فيا يهـون قولهوم ليس يـدمـي ...........................ولـذي راد ضعفـي قواني يرتاح ويهنا