زْمَانْ الْحُگْرَة..

عْلَى يْمِينِي حَدَّادْ..
دَقَّة عْلَى دَقَّة
يَحْمِي قْطِيبُو..
يَكْوِي جْوَارْحِي
بْنَارُو الزَّاهْرَة

عْلَى شْمَالِي جَلَّادْ..
بْسَوْطُو يْهَدْ لَكْتَافْ
وجْرَاحُو مَا تَبْرَا

گُدَّامِي حَصَّادْ..
بِمْنَاجْلُو الْحَافْيَة
يْحَشْ فْزَهْرِي
زَهْرَة.. زَهْرَة
ووْرَايَا لَعْبَادْ..
يِدِّيهُمْ عْلَى حْبَالْ..
مَشْدُودَة فَالْهْوَى
مَا تْشُوفْهَا بِالنَّظْرَة

سَمْعُو يَا لُولادْ
كْلامِي يَدِّيهْ الرِّيحْ
وللِّي سَامْعُو طْرَشْ
مَا يَسْمَعْ هَدْرَة

الْعَيْطَة عْلَى لَجْوَادْ
قُبَّة عْلَى قُبَّة
السّْوَالَفْ مَطْلُوقَة
الجَّدْبَة والْحَيْرَة
الطُّلْبَة.. ومْوَالِينْ الْحَضْرَة

عَرْگْ الدَّادْ..
وعْشُوبْ تْدَّاوِي لَهْبَالْ
وعَطَّارْ شْوَارِيهْ مَثْقُوبْ
حْمَارُو يَعْثَرْ فْلُوطَة
بْهَاذْ الزّْمَانْ
مَا عَنْدُو فِكْرَة

لا مُونَة.. لا زَادْ
السَّعْدْ..
مَرْهُونْ عْلَى وَالُو
ووَالُو خْبَارْ لْيُومْ وغَدَّا
وللِّي نَفْسُو بَارْدَة
وَاخَّ تْدُگُّو بْلَبْرَة

نْشَفْ الْوَادْ
وبْقَاتْ حْجَارُو يْتِيمَة
وَرْحَاكْ يَا الزّْمَانْ
طْحَنْ وعَدِّي
حْتَى صَارْ غَبْرَة

لَقْلُمْ ولَمْدَادْ
بْكَاوْ عْلَى سْطُورْ اللُّوحَة
وشْمُوعْ الزَّاوْيَة
طْفَاتْ عْلَى صَوْتْ لْهَلَّالْ
ولِيلْ الْمَغْبُونْ
مَا فِيهْ گَمْرَة

لَحْطَبْ ولَعْوَادْ
عْلِيهُمْ مَا يْطِيبْ عْشَاكْ
والصِّيَادَة بْلا مْكَاحَلْ
والْبَارُودْ صَارْ تْرَابْ
فِزْمَانْ الْحُگْرَة