عاودت لمخي..

ملي قالو عاود لمخك
تمديت ف وطى خيالي
لقيت شي فهامات شانقين
عل ديالي
دخل مخي يفارق
لقى راسو غارق
وبدا يعيط يالعالي..شوف من حالي
جدي راه عندي غالي
بغى يشرك قشابتي وشنو يبقالي
سوق واشمن سوق هذا
كلها يضرب
وكلها شنو شرب
قالي: انت يالعايل
قلتلو: انت يالراجل
رني شربت عسل
جديد وانت شربتيه حايل
ها: الدليل
ها: لكتاب
عرفتو لديالي ماقراشي
بانلي كتابو راشي
مششتو بالنياب
وصلت لعضام
لقيتو ناقصاه فهامة ولا كذاب
ولا موصي من لحباب

مخي حس براسو يحرقو
ربطتو بقصيدة شديتو
شكون فينا معقول .. وشكون يتفلا
قشابة جدي تحفة ما قلناشي لا
كلشي ف الرفوف محطوط
ونكر الخير رهط من الرهوط

انا مرضي ولا مسخوط
ياك عشت عيشة لقطوط
ماعطيتوني سروال ماشريتو كبوط
رني لقيت توبي
فصلت به سروال عل قياسي جديد
غدي نلبسو فكل عيد
وقندورتي وتاتني
واسعة لقيت فيها راحتي
ونشوف بعيد
بعيـــــــــــــــــــد
نطلق يدي فيها ك بغيت
ولزمان لعرى مانسيت
ما عندي غارض فيك
طبل ولا غيط
ومن جهدك ماتشيط
بغيت غير نسهل عليك
ونساليو الهدرة
يلا وزنتي بالحديد
انا بالذهب الجديد
مخي يفهمني غير بالغمزة
عاش ف يام الحزة
مانبغي حلان لفوام
مانبغي دبزة
وما تقدشي هي
قرن واحد وعشرين
تلفتي وكي على روح لكلام
وشد ف التخمام
ماتطلق صنطيحة
ماتخرج عينين
كن صحيح مايديك ريح
الطبيب جا واركز شكتو في الرجلين
الدمالة فراسي عامرة قيح
دواه حايل من مدة وسنين
الكلام بكى علي
قال خصو سلطان
يااهلي صوتو علي
خدو بين يدكم البيان
الكلام حكمة
قلها ولا سكت..
علم واعقل
تبث عندك توحل
الحق خصو مرا .....
وراجل صحيح
عند هم سبع رواح
لي يعاشرهم يرتاح
الكذوب حفنة من الريح
يزيد ف الراس القيح
ياويلي يلا كنت بصح
سلطان لكلام
كنت نعلق ل حمد اكثر من وسام
احمد زعيم
عرف يشطح
الجيم والميم
وسكت كل لئيم
يا الله..عطيوني البايعة
راه لي ما عرف لي جا ومشى
فهامتو بين البهتان ضايعة

مالين الرزانة والحق
قالو نفسك طويلة
وكلامك مايتقادة فليلة
عوينة تسيل
سلاس خصو فتيلة
قلت لي داز علي ما كان قليل
يا اهل لقبيلة
هذا لي ما تشقو كداميه
مامشى فليل
يجي يتعلم يحبو مع هذا الجيل
كل جيل وجيلو
وكلها يسقد لدموعو كفاش يسيلو
سمعنا خبار ..قديم جديد
كان داك النهار يوم العيد
رماه فقيه من ليام لمسيد
الكلام مديني
وقل راحنا فشكارة الحكرة وهنيني
الحكرة نية
وبنادم عينو معمية
الحكرة سلوم عالي
والعمر قصير واشنو بقالي
جرحة من ورا جرحة
مالقات فتحة الفرحة
ضربة ورا ضربة
الغول كاين
ومنين الهربة
قالو الحكامة لي ماخطاو زمان ولا مكان
اللي عندو باب وحدة الله يشدها عليه
الحق باين را ه....راه
الكذاب ما يكره يشوف بقفاه
هذا درج
هذا تبرج
التالث
كملها.... لعبار تعوج
لبس كيف جدي ولا مشي قدي
وانا نقول بابوري جديد
ويقولو ما يعدي
وذهبي فريد قالو ما يغني مايجدي
غير لي ما فهمنيش يعديني
بقضيب حامي يكويني
الحكاية مازال طويلة
والحجرة وشحال ثقيلة
بانتلي صمة بشعر
ماتهرسة مطرقة
مايقطعها منشر....
الله يهديك ....
خليني ف هبالي
مع المجانين لي بحالي
طريقي هذي سنين شديتو
ضهر فيه المحال
لوح الزمان ..
مايمحيه صلصال
وانت يا جدي لوحك قريتو
ما مواتي لحوال

المفضل الياموني 2010

رائع أخي وأستاذي العزيز المفضل الياموني

متعك الله بالصحة والعافية وأدامها عليك

حتى نستمتع من بوحك الرائع مثل هذه اللوحات الجميلة

شكرا استاذي الغالي سعيد محمودي والله يا استاذي اني اشتقت اليكم كثيرا..