رْمَادْ لَحْلاَمْ



گَرْگَرْ حْمَامْ لَقْصِيبَة

شَدّْ الرِّيحْ بْجْنَاحَاتُ

طَارْ بِيهَا

فِينْ تْبَاتْ النّْجُومْ

عْلَى ضَوْ الگَمْرَة

فِينْ لَفْجَرْ نَاوِي يَصُومْ

صْفَاوَةْ لَحْلِيبْ

فْحْلاَوَةْ الثَّمْرَة

وْگَرْگَرْ حْمَامْ لَقْصِيبَة

فْرَاگْ لَوْقَاتْ

صْبَاحْ المَشْيَة وَاحْلاَمْ اللِّيلْ ...

حْمَامْتِي مَا گَرْگَرْتْ

فْقْصِيبَة ادْخَالِي مَسْجُونَة

مَا شَدَّتْ رِيحْ جْنُونِي

وْطَارَتْ بٍِيهَا

فِينْ طْلاَقْ سْْرَاحِي

عْلَى كْفُوفْ مَكْتُوبِي

فِينْ خَطْوَاتْ رْبَاحِي

تْخَفَّفْ هَادْ الزّْحَامْ

السَّاكَنْ ضْلُوعِي

تْعَرْعَرْ

تْجَرْجَرْ

دَمْعَاتْ


مَلَّتْ هَادْ العَيْنْ

مَنّْهَا سَالَتْ .. وَتْسِيلْ...


بْغَاتْ تْفَرْفَرْ

فْغْيَابِي شْطُونْ

وْتْرُشْ عَتْبَاتِي

بِبْيَاضْ لُونْهَا

لْگَاتْ كْحَالْ

يْشَطَّبْ بْيَاضْهَا

فْكْحَالُ سْلاَمْ بْعِيدْ

صَحّْ مَنْ لَحْدِيدْ

اهْوَالْ مَعْگُودَة بِحْبَلْ طْوِيلْ...


بْغَاتْ تْغَرَّدْ

لْگَاتْ لْسَانِي

نْشَفْ رِيقُ

بِينْ جْمَرْ لَكْلاَم ْ

وَرْمَادْ لَحْلامْ

وكَانُونْ الصّْبَرْ

طْفَاتُ عَفْطَاتْ الزّْمَانْ

صْخَرْ ثْقِيلْ...


حْمَامْتِي رُوحْ

سَاكْنَة هَادْ الرُّوحْ

وَالْفَاتْ عَزْرِي التَّنْهِيدَة

خْلِيلْ

مْسَگْيَة عْشَاهَا

بْدَمْعَة غِيوَانِيَّة

زْهَرْ قْلِيلْ

هِيَّ حْمَامْتِي

وَأَنَا فِدْخَالِي قْصِيبَة

بِينْ أسْوَارْهَا تْمِيلْ...