قصيدة زجلية بعنوان: رسالة... الى موكة


رسالة .. موكة
ا اح..اح.. يا موكة
ا اح على حرفي
اح اح بلحالح
فيه التيه في المالح
فيه الصالح فيه الطالح
|********
طلقت لساني وحاضيه
قالو:الحيط بودنيه
********
بكري...
رضعونا حليب الغول
قالو:عش مسكين تمت شارف
قلنا:عش مسكين تمت مدلول
********
لقيت راسي..داخل سوق لحروف
خارج...سوق راسي
دايخ متلوف
سفينتي ما لقيتلها مراسي
يامن شكى .. يامن بكى
ما من جا الهم عل قلبو
واتكى..
********
قلت نكر للحق
قول الحق..حق
بلادنا زوينة..
بير...كبير
لابسة قفطان حرير
غارق فيها لي يدو قصير
هدي كلمة بلا زواق
كن وارث ولا سارق
********
ها..الديمقراطية
ها الديمهراسية
دخل وتسارى ف السوق
قبل ماتشري حتى دوق
********
بلاد المؤسسات...
الحريات والحبسات
الغشاشين والغشاشات
********
نسولك اميمتي هنية
فين غادة داك لبنية
اخطيك...اخطيك
اوليدي
من الدعارة العشوائية
********
عفاك ياسارح لحروف
نده حرفك لهيه
واحضيه من التيه
عكازو طالبي عندك يعميه
********
الكلمة الهجالة مانزوجهاش
حالتها حالة مانبغهاش
خبزي نطبخو بيدي
ولو يبقى حرفي عزري
********
دم العربي رخيص
يا موسى..
شي توضر.. شي فلكروسة
عندك يا امحمد تزلق
دم خوك سايلة ف الغرسة
********
ياراسي ياراس الغول
خلينا ف المعقول
خلينا ف التيه
التيه جوج بياضق
شادين السباعي
قالو:دراعي يادراعي
********
الدمقراطية والبترول
العربي يحصد الفول
********
يلي قال:الارض عفت الدم
لمسيح...
دم العربي ما بغاش يزول
********
سعدات لي نفسو باردة
زايد ناقص
كنهار التالي فرمضان
********
اح..اح..ياموكة
دربوكتنا من بكري مهتوكة
********
لا لسان واحد
لا نية صافية
لا فقيه قشقاش
لا وصفة شافية
********
وحدو الهدرة ف المنبر
ماتكول كلمة ماتزيد تهدر
********
رني مانزيد مانقص
مانقول غير لي قالو الفاس
********
كلشي ف الكتب مكتوب
ها .... المفضل
ها ...المجدوب

تحية تقدير إلى أخي وأستاذي الفاضل المفضل الياموني
زجلية عميقة وجميلة جدا وتستحق أكتر من قراءة
شكرا للابداع والإمتاع تألق ورقي دائم إن شاء الله

الى استاذي المخلص سعيد محمودي
شكرا على كلماتك الجميلة التي لا تزيدني الا اسرار ومواضبة . كلمات تكلفني اكثر رغم اني احب الكلمة حبا عميقا فبكم يزداد حبي نارا وتشويقا لك مني كل التقدير يا اخي والله اني احسست بالالفة بينكم بعدما كنت غريبا منزويا في جبال البوغاز