السلام عليكم اخواتي اخواني الاعزاء بعد غيبة طويلة لظروف شخصية هانا اطل عليكم اليوم بقصيدة جزلية طالبا من الله ان تروقكم وهي بعنوان شكون المسؤول

شْكوُنْ المْسؤُولْ
مَانِي مْهْوُوسْ.....
مَانِي مْقيُوسْ .....
مَانِي مْسْكوُنْ .....
بْعَايشَة قْندِيشَة
مَا بَاغِي فْلوُسْ
مَا بَاغِي عَترُوسْ
نْدبْحُو قرْبَانْ ...
بَاشْ تْزيَانْ العِيشَة
غِيرْ وْكانْ فْكري مْحْبُوسْ
ولسَانِي حَامْضْ ومْسُوسْ
شَدًانِي.... تبُوريشَة
بَاغِي الهْنَا والسْكاتْ
بَاغِي التْريدْ والفْتَاتْ
بْغِيتْ....رَاحْتِي
.....والعْريشَة
مْن السًرْجمْ ..
الٍريحْ تكلمْ
وسَاط سُوطَة صْعِيبَة
وتبْعَاتُو رْعْدَة...
فِيهَا خُوفْ وحْدًة
وْريحَة غْريبَة
بْرقتْ ..بْرْقَة
ضْوَاتْ ..الدًارْ ...
ونهَاقْ الحْمَار
ونبَحْ الكلبْ نبَاحْ الدٍيبَة
تْقطعْ الضٌو..
وتلفْ الوْلدْ على مٌو
بْصِيفة غْريبَة
وظلامْ الحَالْ ..
وسْكتُو العْكًايزْ ..
لا غَاشِي دَايزْ
غِيرْ صْرَاخْ الصبْيَانْ
عَاودْ ضْربْتْ رْعدَة
دَاتْ جُوجْ ....
بُوشعَيبْ وخَدُوجْ ...
وفَاضُو الوْديَانْ
وتقطعْتْ الطريقْ ......
لا صَاحبْ لا رْفيقْ
مْعَ البرْدْ القاسِي..
ضَرْنِي فْ رَاسِي
وْفِيَقْ الجْيعَانْ ...
لا طرْبُوشْ لا طاقِيَة....
لا مْن يْحْن عْليَا
لا جْمرَة زَانْدَة تسْخًنْ العْريَانْ
سُوْلتْ المْهبُولْ ....
شكوُنْ المْسؤُول....
قال لِي أنتَ وأنَا والضًمِيرْ المْشغُولْ
وهُمَا وحْنَا ..وجْمِيعْ لِي فْ كرْشُو الدْغُولْ

الاخ الفاضل المبدع عز الدين بلفقيه شكرا على هده الزجلية المعبرة في انتظار المزيد محبتي وتقديري

جميل ماكتب الاخ الكريم بالفقيه .....

شكرا على مرورك الكريم اختي لطيفة مودتي

صورة معبرة لوسطنا الاجتماعي فيها الابداع والفن الراقي بوركت اختي نجاة مودتي