منتديات دواوين الثقافية و الأدبية

الشمس ولغربال

شرّحت لكلام
ملحتو بْ هَمْ الدنيا
باش ما يعطي الريحة
ونا ما نتلام
وخّى لْهَمْ رجع حايل
وْكَال ل جْمل
خليك راكَد
ما تْهزْ ما تميل
ما تْكَعّد علينا لميل
غير وْكان أنا
ملْملْت الجمل
على ما كَديتْ
وْفرْكَعْتْ الرمانة
سالو دموعها
بْ حْلاوة شهد لكَطران
اللي شرب من كاسو
شحال من انسان
فْ كل زمان
فْ كل مكان
ومازال......وْمازال.....
لْهَم اللي كان مْخبي بان
واصبح معروف لَ لْعيان
الرمانة سالت وديان
سقات كل عطشان
دْوات ب ألحان
شيعت أكفان
بكى جْمل علاش تْملْمل
حرك سواقي لْهَم
خلى الناس تْألّم
آش درت أنا
آسيدي ربي
لفرح هجر الناس
وهجر قلبي
وعلاش غادي نْخبي
إلى الشمس تغطات ب لغربال
نكُول كلامي هبال
نْجرو بَ حبال
باش عمّرْ ما يبان
وللناس ما يتكَال

وجدة 21/8/2013