القلب و العقل


شتي أ صاحبي القلب فين وصلت ؟
حيت نصحتك ، ما تحركت ما فهمت
مشيت وغمت عينيك بحال لعمى
ما ردت علي وما قلت حتى كلمة
إو، ها الحب ، لي تبعت ، قسم ظهرك
و خلى النهار يعذبك و الليل يسهرك
علاش ما تبعتنيش حيت نصحتك ؟
و قلت ليك : عنداك ، تهلى غير ف صحتك
و عنداك تقرب من نار الحب لتكويك
و يلى ما حرقتك ، تمرضك و ما داويك
ف زمانا ، الحب كيجيك حلو ف دقيقة
وعلى طول ليام ، يدير ليك الشقيقة
عيبك أصاحبي ، كثيق بلي نزل دمعة
لكن السن يضحك للسن والقلب فيه لخديعة
وقع ليك ، أصاحبي ، ما وقع لبحر
حيت كيحب موجة ، كتهرب وهي كتمختر
كتمشي ترامى ف حضان الشط
و عينيه محلولين بحال نتاع القط
ما قادر يمشي عندها و لا يردها
وخا ربها ومن عماق جوفو خرجها
نصحتك ما تدخل سوق حتى تعرف مكانو
و سول عليه مليه . راه ما كيتلف لي بلسانو
ما كرات فيت نصيحتي ولا دتيها ف كلامي
وما ردت علي جواب ، كتبتو ف لواح بقلامي
درت لي فراسك ، و ما فهمت لي قالو سيادنا
لي نطقو بحكام ما درنها ف لفراش وسادنا
بحال : لي بغاك بغيه ولصرك حوزو
و لي جفاك جفيه تعداه و دوزو
عندك الحق أصاحبي لعقل . كنت قليل لفهم
ما صغيت لك ولا لكلام سيادنا قبل ما ندم
الفالطة ديالي ، أنا ل خرجت من لقبر
و دخلت حبس مشيتلو برجلي بلا ما نفكر
و دبا ما خصني ندم ولا لحد نشكي
لحقاش ل ضربتو يدو علاش غدي يبكي
كنت كنقول ليك : أنت عقل رزين
و ما كثيق بكلام حلو ولا بخيال زين
القلب ، ما غديش تبق مهموم البارح و غدا
وأنا لعقل نبقى معاك حتى تفوت الشدة و تعدا
غيرعنداك تنسى و حسب هديك الضربة من عترة
وقول : هديك السحابة دازت وما دامت غير فترة
نصيحتك ، أخويا لعقل ، نديرها حجاب فعنقي
ويلى جا عندي الحب ، مرة خرى ، رميه فسواقي

الثلاثاء 22 ماي 2012
حميد الصنهاجي