منتديات دواوين الثقافية و الأدبية

حكم و أمثال شعبية مغربية

هرب من الحفرة طاح فالبير

النهار المبارك عليك واحد يغديك و واحد يعشيك و النهار الصكع عليك واحد يدعيك و واحد يشهد فيك

التاجر الا طلب لولاد كيجيه غير الريال و المسكين الا طلب الريال كيجيوه لعيال

المزغوب حتى ليلة عرسو قصيرة

الرزق قليل و طاحت فيه دبانة

منديل صفية جيت نمسح فيه مسح فيا

اللي تطوف ما تغزل الصوف

انت مير و انا مير شكون يصوك هاد لحمير

للا مليحة و زادتها ترويحة

لا مزيانة للمنضر لا خفيفة كتسخر

انا نشكيلو بالعكر و هو كيقول لي اش خبار الدراري

حلفات العروسة ما تحب الحماة حتى تبياض الفحمة

اللي شفتيها بسعدها عرفها كتكمل من عندها

الدليل فالرجال هو اللي كيعطي الضحك لجار و الهم لدار

الله يلعن كاس البلار اللي نشرب فيه المرار

مول الطاحونة و السانية و المرا التانية حتى ليلة ما يباتها هانية

خايبة و تنوس و لا غزالة و تهوس
اعمى بن اعمى لي كيشوف الغيام فالسما و كيدير حيكو فالما

قوت التقرقيب وقلة النقيب
اللي عندو الزعفران بزاف كيديرو حتى فالبابوش
عيني فيه و ما قديت عليه

شي فالحلقوم شي تيقولو قوم
مشات تيجب القزبر جات حاملة ب سبع الشهر

المذبوحة كتضحك على المسلوخة .جات مقطوعة الراس قالت الله ينجينا من هاذ الناس

العقبة ف وجه لحباب حدورة

كل ما لعبت المعزة فقرون الجبال كتخلصو فدار الدباغ

الحجلة الخفيفة من سعد الصياد

فولة ما دير بيصار و فارس ما ينوض غبار

سيدي حادق و لالا احدق منو ، سيدي احسابو القديد و لالا كتقطع منو

غرزة زايدة فيا و هم لعرى فايت في

اللي حب الخدم، لا بد يندم، لا سيفة زينة لا قلب مسلم

العِيبْ ماشي على من حرث في السطح العيب لي فالموت وكاي يشطح

انا تنكول لحبيبي وحبيبي تايقول لحبيبو وكلامي فين مامشيت نصيبو

مَشْتَاقْ السَرْوالْ كُلُ سَاعَة يْحَلُ

الحنة حرشة و الحناية عمشة و العروسة فيها بو تفتاف

السوق حامي والدّْلاَّلْ رامي والشاري عْوْرْ

كال لو آش المعمول يا قاضي فعيشه، كال لو طلقها وانا ناخدها

كَالُو لَلْحَمْقَة زَغْرْتِي، كَالْتْ لِيهُمْ الدَّارْ ضَيْقَة

يجي لك يوم ياناكر خيري يوريك زماني من زمان غيري

الزين بحروفو جيبوه ليا نشوفوا

ولد ضبع غير ضبع الى سخرتو يشري لخميرة يشري شمع

شي فالضحك غرقان اشي فالهم حيران

اليد اللي طعمتنا الحلال تيكونو ناسها قلال

هاك ابوه رجليه جابوه

ما بين اللقمة و الفم تيريد ويحكم

الي ما قدرات تكون نجمة فالسما,تكون شمعة فالدار

اللي اربحتيه تاكله و الدين باش تخلصو ؟

رضينا بالهم والهم ما رضا بينا درناه عند راسنا صبح عند رجلينا

حساب الشكارة الربح أو الخسارة

عمر الشطاح ما كاينسى هزة الكتف.

البخيل اللهم فرجلو ولا في النعالة

إلى بغاوك بلا ما تشقى ويلا كرهوك ما تكتر نفقة

الزين ف الدفلة وعروقها حارين

الهم هم لحمار .أما القط كيتسارا سبع ديار

اللبن والزبدة كانو خواتات ما فرقوهم غير لعيالات

نديرو فالحفرة وما نسمع حسو فدار اخرى

الباب المحلولة كتدخل الغول و الغولة

دباز لحباب من العتبة للباب

الي وصل بلاد غير بلادو خل الهم لولادو

اللي بغا يدفع البلا يتوضأ للصلا.

ما تقطع الواد حتى تبان حجارو وما تمشي في الليل حتى يطلع نهارو وما تصحب صديق حتى تعرف خبارو

انا في همو كندادي وهو فتقلاع وتادي

كون تصحابها تكتاب, من دق الباب

اللي ما تيخيط كساتو, يطيب غذاتو, يحلب شاتوموتو خير من حياتو

وجه الشارفة ما يخفى, ولو تحكو بالحلفة

اللهم النعاس في البرد ولا ضيافة القرد

ما تعرف العدو من الصديق غير فالشدة والديق

كلها وحالو وأحوال الناس شلا .واحد بغا المعقول وواحد بغا يتفلا

خيط وفتق .إيوا لعشية شوف آش تنفق

إيوا هاذي خياطة حمقة.فين المقص فين الحلقة؟

قولوا الله يهديهم دارو الخير مع الناس ونساو واليدهم

اللي فالبيضة عر من اللي فقص .واللي فالكرش مضا من المقص

الخير عقبة والشر حدورة

الحنة ما زاة فظفارها والخطاب جابو خبارها

مولات الرجالة كتطمع فالهجالة

كون ما كانو حوايج العطار ما فالنسا ما تختار.

كوليني يا موكة حتى الطيور عافوني

زلقت بيه رجليه طيح الباطل على البلغة

الرزق لحلال صافي بحال لهلال

حانوت غالي ولا حانوت خالي

اللي ما عندو مال ديما وجهو مذبال

اللي بغا يكبر شانو …………….يحرث مع قرانو

العين صعيبة تتقتل الكسيبة وتخوي الزريبة

دابا كلينا وشربنا ……ونسينا الحرابل باش سعينا

دخانهم عمانا………..وطعامهم ما جانا

حبوبة ف وجهي حكيتها سال دمها ………خليتها زاد همها

المرا إلى شافت الشيب بحال النعجة إلى شافت الذيب

السلام عليكم ورحمه الله وبركاته

شكراا أستاذ العزيز محمودي سعيد
دائما تتحفنا بالمزيد ،امثال قديمه كان يستعملها اجدادنا وآباءنا والبعض منها تستعمل حتى الان
تقدير والإحترام
أخوك المختار بن دغة.

شكرا لك أخي على المرور الطيب

أعدك أخي بالبحث عن كل ماهو قديم و عريق

مودتي

اخي العزيز
واستاذي الجليل
سعيد محمودي
امثال مغربية قحة
مستوحات من الواقع المغربي
نشكر لك البحث
ونرسل لك الشكر
والامتنان

شكرا لك أختي الفاضلة فتيحة رشاد لمرورك الطيب وأتمنى لك مزيدا من التألق والعطاء

اخي الجليل سعيد محمودي

باقة جميلة من الامثال الشعبية الاصيلة
شكرا على المتعة وبارك الله فيك
مودتي

أخي وأستاذي الفاضل السعيد بن العيدود

أعدك بالجديد والمفيد إنشاء الله لك كل الشكر والتقدير

شكرا استاد محمودي سعيد
فكأنك كتاب من الابداع والفن والحكمة ـ تبارك الله ـ
هدا كنز وها أنت تشاركنا إياه
لك ودي وتقديري

أخي الفاضل محمد بوبكر

شكرا لمرورك البهي وأتمنى لك مزيدا من التألق والعطاء

بارك الله فيك أخي

منتديات دواوين الثقافية و الأدبية

منتديات دواوين الثقافية و الأدبية

؛كم و أمثال شعبية مغربية (الجزء الأول)