منتديات دواوين الثقافية و الأدبية

نابْ وُ مَنْ وُرا البابْ

الى الصديق الشاعر المناضل
علي ادريسي قيطوني
الى روح ابراهام السرفاتي

غابَة
وُ سحابَة
وُ ثلث دْيابْ
وُ أنا ؟
سامَعْ
وُ طايَعْ
لذوكْ النيَابْ
يَتْفْتَّحْ بابْ
وُ يَتْسَدْ بابْ
يَتْهَرََّسْ نابْ
يَنْبَثْ نابْ ورا البابْ
النَّابْ ...القيدْ
وُ البابْ الاوَّلْ بعيدْ :

حُطوني باش نهَزني
وُ نهَزني مَحْطوطْ
شَلخة مَگدِيَّة بْشلَّة عْوادْ
نكَحَّلْ سَعْدي بَرْمادْها
نزَوَّقْ بْياضي بَسْوادْها
ها الخَطْوَة
ها طريقِي
وُ فينْ الگُوّادْ ؟
نابْ ينوبْ على خوفي
نعَضّ على شفاري فْ شوفي
نلوحْ طوالي هْضُورْ
العَضَّة ...
وُ النَّابْ تمَضَّى
وُ مَنْ البابْ لهيهْ ...كُلشي مَسْعُورْ

النَّابْ ...الدَّخلانِي
سُوسَة فْ قلب البابْ الثَّانِي :

حُلُّوني نخْرُجْ ليَّ
فُكُّوا قَيْدي مَنْ رَجْلِيَّ
وُ خَليوْني نجيكُمْ بابْ
يَتفْتَحْ على الرِّيقْ
يُوَصَّلْكُمْ ليَّ طريقْ
حاضَنْ الخطْوَة
ما عْليهْ قفُلْ وُ لا زكرُومْ
نَكْتَبْ على بابي
لاهْلي وُ ذيَابِي
" الدَّاخَلْ و الخارج مني مَعْدُومْ "

النَّابْ ...الفالتْ
عَتبَة البَابْ الثالَثْ :

السْوارَتْ صَدَّاتْ
و شكون يحل عليَّ
يَلقانِي فيكُمْ
راسَمْ عْلَ ضلوعي ... سْكاتْ الكلمَة
عاطي للنَّابْ طوعِي ... فْ قبَرْ الحَلمَة
نجيكم كُلاَّبْ
نگلعْ النَّابْ
وُ نزرَعْ محبْتي فيكُمْ
تنبَث سُوسَة فْ ذاكْ النَّابْ
نحاسَبْكُمْ بَذنوبْ البابْ وُ ظلامُه
لي صْبَغْ جَلدي بْلونْ قلوبْكُمْ
نحاسَبْكُمْ بَذنوبْ الدَّمْ
ذاكْ ليِّ سالْ... وُ شحالْ
خرَجَتْ مَنْ راسي ،
ما خْرَجَتْ مَنْكُم
وُ بقى دَمِّي تمْ
شاهَدْ...
يَتفاگدْ
حَرّ النَّابْ إلا سابْ
حَرّ البابْ الا صَدَّى على جَلدِي
گُرْحَة الظلمَة لمعانْقة بْكايَا
وُ ياكْ دَمّي مَنْكُمْ فيكُمْ!

يا اصْحابْ البابْ
حُلُّوا عْليكُمْ ...نَدْخُل ليَّ
سَدُّوا عْلِيَّ فيكُمْ نخْرَجْ منكم ليكُمْ
وُ نغَنِّي عْلِيَّ وُ عليكُمْ وُ عْلى ذاك البابْ
"وُ البَابْ البَابْ وَاهْيَا البُوَّابْ ،
مَضَّيتي مَن گدامْ الكُرْسي رَبْعَة النّيَابْ "

تازمامارت ،
نابْ واشْ مَنْ نابْ ...
يَحْفَرْ فْ ضلوعي گالْ يَلْقى البابْ

زَمَّمْ الرُّوحْ فْ شَهْقَة الظلمَة
خَيَّطْ مَنْ جْرَاحْ مَرْگومَة عْبَانَة للصَّمَتْ
سايَسْ الدَّمْعَة وُ احْفَرْ ليها فْ خَدَّكْ مَطْفَيَّة
يَمْكَنْ فْ صْباحْ طَيَّارْتَكْ تَشْرُبْها مْعَ الرِّيقْ
اشرُبْ لبْحَرْ وُ مْدادُه مالَحْ... لي ما عليه شمسْ
كُنْ ضيفْ صالَحْ... وُ اقْطَعْ النَّفسْ
يَتْقَوَّسْ ظَهْرَكْ ... يَمْكَنْ
يَشيبْ راسْ هَمَّكْ ... يَمْكَنْ
وُ لِّي شاطْ لِكْ مَنْ لي يَمْكَنْ
ساويهْ بَعْرُوقَكْ وَطْرَة وُ غَنِّي :
"وُ البَابْ البَابْ وَاهْيَا البُوَّابْ ،
مَضَّيتي مَن گدامْ الكُرْسي رَبْعَة النّيَابْ "

أگدَزْ ،
الكُرْسي اِلا خْنازْ وُ سَوَّسْ ما يْهَزُّوهْ غيرْ نيَابُه

ها كَيْتي هَا ليعْتِي
هَا فالْ قْرايْتِي
عَيْطَة مَبْحُوحَة... بَرْمادْ الوَقَتْ
كَيَّة مَجْرُوحَة... وُ فينْ النَّعَتْ ؟
هَا المَگدِي يَگدِي
وُ النَّابْ عْلَ البابْ مْصَدِّي
وُ انا ساكَنْ فيَّ وَحْدِي
كُلْمَا هَزِّيتْ صَخْرَة بَرْمُوشْ عَيْني
يَزاوَگْ فِيَّ الحَاجَبْ
نحُطْها وُ نْحُطْني
عْيِيتْ ... يَمْكَنْ
تْهَدِّيتْ ... يَمْكَنْ
راني ما طاطِيتْ
نَجْمَعْ مَنْ عَضَّاتْ النَّابْ حْرُوفْ
نْلاقِي كلامِي فْ ليلْ جْرَاحْي
نَشْطَحْ مَذْبُوحْ
نْغَنِّي مَجْرُوحْ :
" البابْ البَابْ واهْ يا البُوَّابْ
مَضِّيتِي مَنْ گدامْ الكرْسي رَبْعَة النيَابْ "

درب مولاي الشريف
شْكونْ فينا الشْريفْ فْ دَرَبْ مولاي الشريف ؟

آشْ هذا السَّعَدْ يا بَنْسَعَدْ(1)؟
وُ "سوسيكا" شاهْدَة
وُ النَّابْ ماضي
الكُرْسي حاضي
وُ الجَّهَدْ لا جَهَدْ الله مْقاضِي
وُ انا وَسَطْ الحُجَّاجْ مْطَوْفانِي جْراحِي
هَا غُمِّيضَة هَا قاشْ قاشْ
ماتْ مُولايْ الدَّرَبْ
وُ الشريفْ عاشْ
وُ ساويوْني عْلى اوتارْ "خُلِيْفة"(2)ف "سُوقْ الكلبْ "(3)
نْغَنِّي... عْلَ غُدَايَدْ مْحَايْنِي
نعري البانضة
وُ ياكْ الشُّوفَة حامْضَة
وُ نجيني مَنْ اليَمينْ حْتى اليَسارْ
وُ صارْ لي صارْ
يا القيطوني يا عْريسْ الظَّلْمَة
يا الادريسي...
اطْلَقْها مَنْ جْراحَكْ غُنَّة وُ نَغْمَة
ياكْ بْنَى حَبَسْ...
وُ بينْ حَبَسْ وُ حبس علَّى سْوارْ السُّؤالْ
وُ بضْلوعْنا تَبَّثْ القُضْبانْ
وُ قالْ يَرْمينا فيهْ
خَرَجْنا مَنُّه ...يَمْكَنْ
فْلتْنَا مَنْ هَمُّه... يَمْكَنْ
وُ ياكْ بقاتْ صُورَة البانِي مَسْجُونَة فيهْ
وُ لي شريفْ فْ درب مولاي الشريف
رْكَبْ عَلْ الحَلمَة
وُ طلقْها عْيُوطْ وُ نَغْمَة
"وُ البَابْ البَابْ وَاهْيَا البُوَّابْ ،
مَضَّيتي مَن گدامْ الكُرْسي رَبْعَة النّيَابْ "

قَلْعَة مْگونَة
حتى الحَلْمَة مَسْجُونَة

النَّابْ لي نابْ عَلْ الجُرَحْ
النَّابْ لي ذابْ على جَلْدِي
النَّابْ لي سابْ حتى تخَطَّى جَهْدِي
وُ ها الجَسَدْ خَريطَة لذيكْ الطريقْ
وُ ها گلبي مْگَلْبُه بُو گليبْ
وُ هَا لعْقَلْ عاقَلْ
يَنَعَّتْ بَضْلوعُه
جْبَلْ وُ ما عْطاكُمْ طوعُه
وُ السَرّ فْ الآتي... يا السرفاتي
تعَلَّمْنا كيفْ نكونُو
ما نهُرْبُو ما نخونُو
تْعَلَّمْنا مَنَّكْ سَرْ لعْيُوطْ
مَنْ وَطْرَة جْراحْنا وُرا لَحْيُوطْ
نْهَزْني لْطِيَّارْتي
نْهَزْني لْفَلاقْتِي
وُ نْغَنِّي ...مْعَنِّي
بَالصُّوتْ وُ ما خَلَّى
الجُرُحْ على جْراحُه يَتْفَلاَّ
"وُ البَابْ البَابْ وَاهْيَا البُوَّابْ ،
مَضَّيتي مَن گدامْ الكُرْسي رَبْعَة النّيابْ " .َ

القصيدة بالصوت :
4shared.com /audio/ZeSyMKfd/rec1126-212357.html

(1)الزجال محمد عزيز بنسعد
(2)من رواد فن الحلقة
(3)من الاسواق الشعبية القديمة بالحي المحمدي

سعيد محمودي كتب:: لك كل الشكر أخي وأستاذي الفاضل علي مفتاح على هذه التحفة الزجلية للمبدع المتألق الزجال محمد عزيز بن سعد الدي اكن له كل الاحترام والتقدير ماروع ماقرأت هنا لكم اجمل التحيات ومزيدا من العطاء والتألق

اخي و صديقي الزجال سعيد محمودي

اشكرك على المرور ،فقط الفت انتباهك ان القصيدة هي لعبد ربه "علي مفتاح "
و ليست لعزيز محمد بنسعد ،
محبتي و احترامي

أنا بدوري أخي علي مفتاح كنت اعتقد انها لعزيز محمد بن سعيد لانك وقعت في أسفل القصيدة ب:

(1)الزجال محمد عزيز بنسعد
(2)من رواد فن الحلقة
(3)من الاسواق الشعبية القديمة بالحي المحمدي

ما أروعك أستاذي وأعتذر على هذا الخلط الذي وقعنا فيه أنا وصديقي سعيد محمودي
وللأمانة الأدبية سوف أقوم حالا بحذف مداخلتي التي أخطأت الطريق .
لي عودة إلى التعليق على رائعتك
مودتي وتقديري لك

أعتدر لك أخي وأستاذي الغالي علي مفتاح لقد تسرعت ارجوا المسماحة
لقد اعجبتني القصيدة ولما رأيت أسم المبدع محمد عزيز بنسعد لم انتبه
لقد حدفت ردي وأجدد لك اعتداري
أما بخصوص قصيدتك فهيا أكتر من رائعة أخدتني ولم أبالي
لك أغلى التحيات ومزيدا من العطاء والتألق

الله الله الله ما اروعه من زجلية
ان كان لك هذا الابداع استاذب مفتاح فاعلم انك تحلق عاليا في سماء الابداع الزجلي واعلم ان بريق نجمك سينير هذا النوع من التوجه الابداعي الشعبي
استاذي مفتاح على الرغم من الاختلاف البادي بين توجهين في الكتابة الزجلية الا انني وجدتني فعلا اتفاعل مع هذه القصيدة النابية في نوع من الاعجاب والانبهار خاصة في المواضيع التي تتلاطم فيها العبارات والمعاني التي تكتنزها قصيدتك هاته يا اصْحابْ البابْ
حُلُّوا عْليكُمْ ...نَدْخُل ليَّ
سَدُّوا عْلِيَّ فيكُمْ نخْرَجْ منكم ليكُمْ
وُ نغَنِّي عْلِيَّ وُ عليكُمْ وُ عْلى ذاك البابْ
وهذا زجال الصحراء يقف لك احترما لها الابداع الزجلي الرائع
الذي يلخص شعاره في الابداع الزجلي " الكلمة والحرف والمعاني شموع النور فالدرب الغيواني "
مودتي واحترامي

الاستاذ الراقي والاستاذ الجليل
علي مفتاح
ناب من ورا الباب
قصيدة رائعة
روعة صاحبها
دمت للحرف مبدعا
وللمنتدى وفيا
تحياتي
ومودتي

الزجال علي مفتاح
هده قصيدة تستحق الرجوع إليها أكتر من مرة لغزارة معانيها
تعمقها في معاني الاحدات جعلها لوحة زجلية رائعا جدا
لك احترامي وتقديري

زائر

اعجبت كثيرا بهذا الاسلوب الراقي جدا .قصيدة اشبعتني . فاانحنيت احتراما لهذا المبدع . تستحق استاذي على مفتاح كل التقدير والاحترام

كعادتك الاخ المحترم السي علي مفتاح كلام ومعنى واسلوب فطي مغنى دمت لاإبداع مبدع
تحياتي اخي

اخي علي مفتاح
شكرا تحياتي الحرة صورجميلة
لك الشكر
خوك انا

شكرا للاستاد المحترم والمبدع
علي مفتاح
على هذه القصيدة الجميلة
التي تحمل فطياتها الشئ
الكثير ونرجوا أن لا تبخل علينا
بقصائدك المتميزة لنستفيد ونتواصل
اكثر شكرا لك مرة اخرى
تحياتي ميلود ثلاثي

» من ثقب الباب
» دق الباب بيدك
» الباب تقرعه الرياح للشاعر بدر شاكر السياب

منتديات دواوين الثقافية و الأدبية

منتديات دواوين الثقافية و الأدبية

ناب و من ورا الباب ...