زِينَةْ لَبْنَاتْ
يَا زِينَةْ لَبْنَاتْ
يَا رَحْبَةْ لَوْقَاتْ
يَاعْشِيَّة تْعَاشَاتْ
صَهْلِي عْلَى حْرُوفِي
وشْتِّيهُمْ تَشْتَاتْ
لَعْرِيفَة وَسْطْ لَبْنَاتْ
دَّاتْ
زِينَةْ لَبْنَاتْ
مُغْزَلْ وقُرْشَالْ
وحَيْكْ
مَصْبُوغْ بْلُونْ الشَفَّاتْ
خَلاتْ
الرَّعْدَة نْوَاقَسْ
بِينْ كْتَافِي زْهَاتْ
خَلاتْ
لْسَانِي يْحَرَّكْ فْكْلامْ
يْخَاوِي الزَلاتْ
خَلاتْ
نَارْ هْوَاهَا
قْطِيبْ مْشْهَابْ
يَتْبَوْرَدْ فْالذَّاتْ
خَلاتْ
الشُّوفَة مَعْگَازَة
فْخْيَالْ لَبْنَاتْ
تْقَلَّبْ عْلَى زِينَةْ لَبْنَاتْ
شَفْتْ جْلايْلْهَا
فْيَدْ عَطَّارْ
يْكَوْغَطْ فِيهُمْ الْحَنَّة وْرَيْگَاتْ
شَمِّيتْ عْطَرْهَا
فْزْنَيْگَةْ الْوَرْدْ
ولَحْبَقْ
والْبَرْكَة زْهَاتْ
بَانْ لِيَّا زِيفْهَا
عْلَى غْصُنْ شَجْرَة
عْلِيهَا سْبُوبْ الْعَزْبَاتْ
وعْلَى جَنْبْ الْوَادْ
طَاحُو عَفْطَاتْهَا
كِيفْ الْبَطِّيخْ فْبْحَيْرَاتْ
بَانْ لِيَا حْزَامْهَا
فْمَرْبَطْ الْخَيْلْ
گْيَادْ الجَّدْعَاتْ
سْخَفْتْ.. فَقْتْ
لْگِيتْ زِينَةْ لَبْنَاتْ
مْتَكْيَانِي عْلَى ذْرَاعْهَا
الرَّگْبَة
مْجَرّْدَة.. ضَحْكَةْ لَوْقَاتْ
صْدَرْهَا لَحْنِينْ
لُوحَةْ طَالَبْ
مْخَرَّجْ تَخْرِيجَاتْ
يْدِيهَا مْحَنَّة
صْبَاعْهَا قْلُمْ
كَاتْبْ اللُّوحَاتْ
سْخَفْتْ.. فَقْتْ
لْگِيتْ زِينَةْ لَبْنَاتْ
مْشَاتْ
تْلَفْ رَيِّي
مَخْزُونْ وَسْطْ خْيَالْ لَبْنَاتْ
رَدُّونِي هْبِيلْ
رَدُّونِي سْبَعْ بُولَبْطَايْنْ
بَابَا عَاشُورْ
سَارَحْ مْشَّگْ لَگْدَامْ
وقْصَارَتْهمْ عَادْ حْلاتْ
هْرَبْتْ مَخْزُونْ
تَحْتْ غْرُوبْ الشَّمْسْ
تَالَفْ مَجْنُونْ
وكْلابْ الدُوَّارْ تَنْبَحْ
خَرْجُو نَاسْ لَقْبِيلَة
"شَفَّارْ.. شَفَّارْ"
"حَرَّاگْ النّْوَادْرْ"
"شَفَّارْ لَكْبَالْ والْكَرْمُوسْ"
وحِيثْ أَنَا مَنْحُوسْ
طَحْتْ گُدَّامْ رَجْلِينْ ابَّاهَا
طْلَبْتْ ورْغَبْتْ
عَاشَقْ بْهَاهَا
كَتّْفُونِي
وفْلْمَطْمُورَة لاحُونِي
حْتَّى لْصْبَاحْ
يَفْتَحْهَا فَتَّاحْ
ومْعَ لَفْجَرْ
سْمَعْتْ صَوْتْ رْقِيقْ
رْمَى حْبَلْ مَعْگُودْ
شْدِّيتُو وطْلَعْتْ مَجْبُودْ
اهْرُبْ.. اهْرُبْ..
مَنْ وَسْطْ جْنَانْ الشُّوكْ
اهْرُبْ.. وسِيرْ گُودْ
تْلافَتْ، لْقِيتْهَا زِينَةْ لَبْنَاتْ
عَيْنِيهَا قَنْدِيلْ
كَبُّو الْمَا فْرْكَابِيَا
زْحَفْتْ
ونْسِيتْ حَالِي
والصّْبَاحْ يْقَبَّلْ نْهَارُو
هَرْبَتْ زِينَةْ لَبْنَاتْ
وهْرَبْتْ وَسْطْ الضّْرَگْ
نْگَلَّبْ الشُّوكْ بْگْدَامِي
والدَّمْ دَارْ طْرِيقْ
اصْبَحْ صْدِيقْ
لَقْبِيلَة
بْحُرْقَةْ زِينَةْ لَبْنَاتْ.
الزجال المبدع محمد مومر
الرئيسية
موضوع: قصيدة بقلم أستاذي الزجال المبدع محمد مومر زينة لبنات 
الإثنين 20 سبتمبر - 22:36
