منتديات دواوين الثقافية و الأدبية

هــمــوم الــبــحــر

السما(ء) ك تبكي ع البحر
حيث شافتو مهموم و هايج
ما قدو فراشو وخى واسع
ما ينعس ، لا ليل لا نهار
رغوة خرجات من فمو
رماها قلبو ل فاض بالهم
* * *
شافو الصخر ل ضاير بيه
مرة تيبكي حتى هو على حالو
أو مرة أخرى تيمسح دموعو
أو هو تيرغبو، باش يبقى هادن
بين شقايق الصخر ، البحر فلت
* * *
حتى أولاد الرمل ما قدرات
تنشف هموم البحر الكثيرة
أو دموع السما(ء) الغزيرة
غلبتها الهموم حيث قصيرة
* * *
الويدان جات تزور مقامو
هازة ليه همومها الثقيلة
لقات همو يغطي همومها
بغات ترجع بالزربة لوكارها
القات الطريق مشوكة وطويلة
* * *
جات الڦمرة بانوارها فرحانة
بغات تغطيه بسلهام ابيض
أو تحيد عليه ظلمة الزمان
ما طولات ، الشمس جات
أو عرات هموم البحر الهايم
* * *
آش بدو ما يدير هاذ البحر ؟
الزمان ، اقوى منو و من لي
بغاو يخرجوه من همومو
وخا قوي ، هدو الزمان

حميد الصنهاجي
الثلاثاء 10 مارس 2015

أشكون اخويا حميد لي ما إهدو الزمان

ما علينا جميعا إلا الصبر والتحدي

ولنا في اسطورة سيزيف اكبر عزاء

تحيتي اخي حميد وبالتوفيق دوما في كل الاعمال

السي حميد الصنهاجي تحياتي

أو دموع السما(ء) الغزيرة
غلبتها الهموم حيث قصيرة
* * *

أخي الكريم الأستاذ حميد الصنهاجي مزيدا من التألق والعطاء تحياتي الصادقة

الدنيا مرة ليك ومرة اعليك
هذه سنة الحياة