منتديات دواوين الثقافية و الأدبية

حْدِيثْ مْعَ لْقَلْبْ

مَابِينْ حُلْمْ وُفْيَاقْ
مَابِينْ لْوَحْدَه وُلْفْرَاقْ
ﯖلْتْ لْقَلْبِي أُبْلَا نِفَاقْ
'تَايْقُولُو السَّمْـــرَاتْ حْنِيـــنَاتْ'
طْلَعْ يَا سْيَادِي مَا سَهْلْ

ﯖـالْ لِّيَا:
جَرَّبْ وُحْكْمْ إِلَا كُنْتِ فَاعْلْ

ﯖـلْتْ لُو:
يَا سِيدْ لْفََاهْمْ
واش مَاهَنَّاتْكْ لْجْرُوحْ لِّلي خَلْفَاتْهَا لْحَمْرَه
ولَّا بْغِيتِي تْفْهَمْ عْلِيَا بْلْهَضْرِه
مْشَاتْ يَّمَاتْ لْحَـﯖـرَه
زْمَانْ كُنْتْ نْثِقْ فيك
تْلُُوحْنِي فْ كُل حَفْرَه
عِينِيَا ضْوَاوْ
مْشَاتْ يّمَاتْ الظّلْمَه
مَا يْهَمْنِي إِِلَا كََانْتْ بِيْضَاء
ولّا زَرْقَاء ولّا حَتَّى سَمْرَاء

كُلْ مَرَّة وُفَينْ رَاكْ تْشُوفْ
عِينِيكْ دُوَّارَه يا لمَلْهُوفْ
فْكُلْ حُومََه وُدَرْبْ وُلِّيتِ مَعْرُوفْ
مَانْثِقْ فَيكْ، أُبْلْ لَحْلُوفْ
شُوفْ كِيفْ رْدُّوكْ يا قلبي كُلَّكْ مَنْتُوفْ
شُوفْ السِّهَامْ فْ صَدْرْكْ كْهُوفْ
دَمَّكْ كْشَفْ وَلَّيت مَكْشُوفْ
مَالَكْ مَنْ دُونْ لْقْلُوبْ
لَـلْخَالَقْ مَابْغِيتِ التُّوبْ
سْحَابْكْ فْ هَذْ لْحَالْ غَادِي تْكُونْ عَنْدْهُومْ مَحْبُوبْ !؟

ﯖـالْ لِّيَا:
عْلَى وُدَّكْ
شْحَالْ صْبَرْتْ لْجْرَاحْ لْحْبِيبْ *** وُنْـﯖولْ مْعْــــــــــــــــذُورْ
نْعْطِي مَنْ فِيضْ حُــــــــــــبِّْ *** وُأَنَـــــا مَسْـــــــــــــرُورْ
نَرْْوِِي بْحْرُوفْيْ كُلْ عَطْشَـــانْ *** وُنْْـﯖولْ غِيرْ سْطُـــــورْ
نْدَاوِي كُلْ عْزَاوِي وُلْهَــــــــانْ *** وُنْْقُولْ حَتَّى أَنَا رَاني فايتْ مَدْبُورْ
نْوَاسِي كُلْ مَهْمُومْ سَرْحَانْ *** وُنْْـﯖولْ اخَّرْتْهَا لْقْبُـــــورْ
صَبَّرْتْ شْحَالْ مَنْ إِنْسَـــــانْ *** وُنْـﯖولْ الْأَيَّامْ تْــــــــدُورْ
ْ
ﯖـلْتْ لُو:
نْعَـــــــــمْ !
لْيُومَ بِكْ أَنَا هْنَا
وُ مْعَ لْحْبَابْ تْجَمْعْنَا
زْمَانْ مْلِّي كَانُو فَيكْ لْأَلْوَانْ
كُنْتِ تَرْسَمْ لْبَسْمَة فْ لْوْجُوهْ فَنَّانْ
تَطْفِي لْقْلُوبْ لِّلي شَاعْلَة نِيرَانْ
وُتَبْعَثْ لِيهَا لْوْرُودْ لْكُلْ عُنْوَانْ
كَانْ خِيرْكْ مْدْرَارْ جْنَانْ
وُقْتَاشْ تَرْجَعْ دِيكْ لْأَيَّامْ مَنْ مْكَانْ ؟!

يونس الفجـري
___________
2014-2-20