حروف النسا
حروف النسا مَ بْهاها بكلام ومعاني
تْطيب لجراح وقاريها ما يعود يعاني
حروف النسا جبال شامخة وعالية
صابرة لحرْ الشتا وللريح لعاتية
حروف النسا قوامها عود الصّبّار
واقفة صامدة للصّهد الكَهّار
حروف النسا جنينة بالف لون ولون
كل ها وْ سرو وسبحان خالق لكون
حروف النسا خطوطها صافية بلارة
تْهدّا النفوس وتْخذل لقلوب الجبارة
حروف النسا ف ليد شمعة كَادية
وخّى تّحرق ديما بنورها هادية
حروف النسا كتاب واضح مفهوم
تقرا معانيه يطير من عينك النوم
حروف النسا الى بكات م لقلب دوات
م الهم والغم شحال تكوات
حروف النسا نجوم مْضوية حياة آدم
الى طفات يعود ديما يتلام
حروف النسا تاج ملأملأ فوق الريوس
شحال مّا علا تشوقت ليه النفوس
حروف النسا خرير ماها نبع صاف
تشرب منو تّطفى ليك نار لعوافي
حروف النسا شجرة تكبر وتورق
تثمر خير كثير ومنها ما تقلق

نجاة احسايني 16/3/2014