كان احلى ما فيكى يا بلدى ونس
وعيون سهرانه حواليكى حرس
وضحكه صافيه تجلجل جرس
حوارى فيها من كل صنف ودين
متجمعين على طبليه واحده ازاى
قاعدين فالعصارى مع الفناجين
متأنسين مستنيين لما يغلى الشاى
والسهره تحلى على صوت الناى
والقمره طالعه والليل يطول
واللمه بدرى على عربية فول
كان احلى ما فيكى يا بلدى الاصول
والشهامه والجدعنه وولاد البلد
مجنونه يا قوطه ومعسل يا ولد
كان فيكى صفا جوه النفوس
وشفا وخميره يا عرقسوس
وقفشه ونكته وكفك يا عم
وحلاوه وشقاوه وخفه دم
كان احلى ما فيكى قلب يِضُم
كان ليا فيكى يا مصر أُمُ
لمى عيالك تانى فحضنك
وطبطبى علينا ولا تعاندى
ده احلى مافيكى يامصر طيبتك
مهما حصلك تفُوتى وتعدى
دى خلطه عجيبه فيكى يابلدى
معجون بيها طينك وزرعك وارضى
دايبه ففاطمه وجرجس وعبده افندى
والعنبه طالعه فوق زرعة يوستفندى
والتوته زرعها عندك ونبتها عندى
دى خلطه عجيبه فيكى يابلدى
وسرها منقوش على ورق البردى
شعب مخلوط فبعضه وده سر التحدى
كان أجمل ما فيكى يا بلدى انك
سمك على لبن على تمر هندى