منتديات دواوين الثقافية و الأدبية

سَاكَنْ حْزَامِي

عَادْ سَاوِيتْ كْتَافِي
وْنَاوَلَتْ لَحْمَلْ
مَشْيَة فَصْوَابْ الحِيرَة
تْنَاوِيلْ
بِينْ الِّليلْ
وَالجَبْهَة
سْلاَمْ بَاهَتْ
مَخْزُونْ
مَرْهُونْ
مَفْتُونْ
فَعْشِيَّة بْلاَ صْبَاحْ مَغْزُولْ...

مَا يَهْبَشْ غِيرْ الْهَمّْ
فكْنَانَشْ بْلاَ دْوَايَة
وَلاَ قْلَمْ
بْغِيتْ نَفْهَمْ
فْرَكَتْ جْلاَلَةْ الْغِيبَة
فْرِيكْ الدَّزَّة الْمَضْيُومَة
فَتْعَاوِِيدْ الْمُغْزَلْ
لَلْقُرْشَالْ
خْيُوطْ رَاشْيَة
مَجْدُولْ...

عَنَّگْنِي حْزَامِي
صْبَرْ
وهْدَرْ
بِينْ الجَّلْدَة ولَعْظَمْ
وْسَلَّمْ فَجِْبيدُ
تَعْنِيگَة
كَمّْدَتْ
السَّاكَنْ حْزَامِي
تَخْمَامْ رْهِيفْ
فَالشُّوفَة مَهْبُولْ ...

نَهْبَلْ
اِلَى كَانْ هْبَالِي
سَارُوتْ قْفَالِي
وَاگْفْ عْلَى بَابِي
نْحُلّْ فْغِيبْتُ بِيبَانِي
سْمَا مْشَرّْعَة فْدَقَّانُ
جْوَابْ مَعْلُولْ ...

قَرْصَة مَنْ لَحْزَانْ
وْلاَ تَمْشِي فَالْتَة
مَنْ زْمَانْ
كَابّْ غْيُومْ نْدَاهْ
كْذُوبْ
وَشْمُوعْ
مَاطُّوعْ
غِيرْ فْتِيلْ الشَّمْعَة
بَهْوَالُ مَفْتُولْ ...

كِيفْ هُوَ حَالِي
فْحَالْكُمْ
يَعْطِيهْ الدَّا
بَعْدَة وَاشْ عْرَفْتُوا
بَالِي فْصُورَتْ حَالِي
مَشْدُودْ
بَلْسَانْ الْبَارَحْ
حَطّْ لَعْذَابْ للِّي جَايْ
فُوگْ للِّي الفَاتْ
بْخَطُّ كَاتَبْ
غْرَامِي فْلَعْذَابْ
عْدُولْ ...

كْفِيوْا هَادْ لَغْطَا
قُبّْ جَلاَّبْتِي حْدِيثْ
إِلَى صَبَّتْ كْتَافِي
عْرَگْ
كَرْبْلُوا تْرَابِي حَرْثْ
يَنْبَثْ
الْمََا
فَغْيُوْم السّْمَا
الْمَحْرُوثَة
بَسْوَاكَنْ الْعَلْوَة
وگُولْ أَشْرِيفِي گُولْ...

شْرِيتْ كَفَّة
فَسْلاَمْ لَخْفَا
لَكْفُوفْ سْلاَمِي
عَفَّةْ
كَفَّة ذَابَتْ
وكَفَّة بَرْكَتْ تْعَاوَدْ
بِينْ سْنَاسَلْ "الصُّورَة"
شْعَابْ مَهْبُولَة
فِيهَا غْرَايَبْ
وغْرَايْبِي زْبِيبَة
بِينْ خْدُودِي تْجُولْ...

وَرّْدَتْ هَادْ الْعَفْطَة
مَنْ تْرَابْ الدَّنْيَا
عْطَشْ..
وْمَا رَشِّيتْ لْسَانِي
يْفِيضْ رِيقُ
بَكْلاَمْ
يَنْوِي صْيَامُ
فَصْبَاحُ مَحْلُولْ ...

حَالَتْ ظْفِيرَةْ
هَادْ الخُشْبَة
مَنْ جْدُورْ لَوْهَامْ
كُونْ كَانَتْ جْبِيرَة
نْكُونْ صْبَرْ
لْهَادْ الْجَبَّارْ
گَصْبَة
تْغَنِّي مَوَّالْ
فْخَوَاطَرْ السَّامَعْ
انْغَامِي
شْحَالْ گَدِّي مَا نْعَاودْ
وَ نْگُولْ .....

دائما متالق اخي مومر فكلامك له دللات ونفحات اصيلة نابعة من عمق بلدنا الحبيب فدومت وفيا للكلمة الهادفة

امتعتنا استادي قصيدة رائعة شكرا لك ومرحبا بك بيننا تحياتي

تحيتي الشاسعة بحجم السماء أخي مومر
لقد استمتعت هنا بزجلية جميلة ، ننتظر منك المزيد من الإبداع
مودتي وتقدير لك

الاخ الجليل السي محمد مومر
لقد قلت لك يوما اني اتابع زجلياتك اينما رحلت وارتحلت وها انا استمتع بها الان
تقديري واحترامي

مرحبا بك أخي

و أستاذي محمد مومر إنه لشرف لنا

أن نستمتع بقصائدك المتميزة في هذا المنتدى

الذي زاد إشراقا بك أخي

مودتي

سعيد محمودي

شكرا جزيلا على ردودكم القيمة
مع كل التقدير والاحترام
مودتي

كلام جميل امتعتنا اخي الكريم

منتديات دواوين الثقافية و الأدبية

منتديات دواوين الثقافية و الأدبية

ساكن حزامي....