الحربة
سمعوا قصة حمان يوم جا يتزوج يامن تسال وخدا عصريا
وندم عن شاين دار يوم روح صابغ لنجال
*****************
سمعوا قصت حمان كان حايل هو و أباه في زمان الجهليا
تربى فلكزية بلحفا ومحزم بطوال
وخدم حتى جمع لفلوس واشرى حندير كيفردها حمدوشيا
دار فرجله بلغة مطلعه وقميص وسروال
واعمل رزة متبرجه لواها بالصنعه ودار ليها طاقيا
ثم ربي لحية بشي عزافر واعمل لعبال
غوفل وجه ومشى يا فهيم للحجام اللي يوالمه الجوطيا
حجام رفيع الاسم من فريحه فايق المثال
حسن ومشى لدار قال لمه زوجني من بنات لحضر عصريا
انتي شوفي لي لزين وأنا نسخى بلمال
قامت ايماه وطلبت لحوايج لتحليقه ثم جابت سبنيا
كذلك الجلاب لونها خابوري مذبال
خرجت ومشات تدور عل لخطبة دارت لبلاد كلها في صبيحا
دخلت لدار لسانها رطب مأدب عمال
صابت ف الدار مرا بحالها بهله وقديمه ولا بسة منصوريا
والرجل ف الركنة مفايحي بالرزة والشال
قالت مولاة الدار : ما بغيتي ؟ قالت ليها : سمعت عندك صبيا
وأنا عندي ولدي ظريف وبغى زوجه لحلال
قالت إيمان البنت : خبريني بقبيلتكم والسميه والكنيا
والحومه فاش انتم باش نعرف ناسي ف الحال ؟
قالت إيمان الولد : ما عرفتني شي من غير شك أنا عربيا
سقسي عني في درب واندوا واسمي ما يجهال
أنا طامو المقدمه سيدي ميمون قبيلتي شجعيا
طبيبه وشوافه مقابلة عند صحاب لحال
ولدي هو حمان سول عليه الجزارة جميع من غير خفيا
ولكوادا بجميعهم واهل لكرنة الفضال
سول ناس الحومه كلم يشهدوا في خريجفه شهاده جهريا
حمان الخربيطي كتعرفه نسا ورجال
قالت إيمان لبنت : لو عرفتي حتى بنتي من بنات لوقتيا
ظريفه ورجيحه وناسبه حازت كل لجمال
خبريني بعدا عل لعريس آش نهي حرفته بلا شكيا ؟
قالت إيمان لولد / في لجواب صغى لا تمهال
ولدي معروف في ذا لبلاد معلم جزار ليس يرضى قبيحا
اسمه ظاهر حمان ما خفي ولد أبا علال
زادت إيمان لولد قالت ليها : حتى أنتما منين ؟ بلفاظ قويا
ولعروسه بعدا منين هي ف أول المقال ؟
قالت إيمان لبنت : لو عرفتي أنا خيتي طهور بنت الشاويا
وأبا هو رزوق راه ف جوطية دلال
وأبان لبنت شهير كان منسوب لدر قاوه وكان داير شاشيا
تسبجوا باكوري ويتكنى عمي غوفال
وليوم كبر وعي وشاب وبقى ف الركنه كيزيم صبحن وعشيا
وولدنا هاد لبنت كيف قدر نعمل متعال
كان سمها " كتو " منين زادت كبرت سمبتها لهيفة ثوريا
وقرات النحو عل لكمال بالاداب وتفصال
ودوات أمي طامو بعد هذا قالت ف لحين : ياطهور الشاويا
آش طلبتي ف صداقها نأديه بلا تعطال
قالت سيروا بعدا لعمها هو يعرف ما يدير ف يده لقضيا
قالت إيمان لولد : في يكون بلا تمهال
لقالت في باب فتوح راه كانت عنده حانوت صايله نبانيا
واليوم فكرووا شهير بن عاشور لغسال
ساروا عنده الليل بالمشيخه ونعم ليهم عاد كملة لعطيا
وشراط قفطان خضر ف الصبوحي وماية ريال
ودفع حمان صداقهم وشراط عنهم لعرس ف زمان الصفيا
قبلوا ومشاوا بزوج كل واحد شمر وحتال
وجد حمان جميع ما يخصه وشرى بقرة من زريبه نوحيا
واعرض ف لحين عل حمادشه جاوا على لكمال
أمه كانت هي لمقدمه منسوبه من حالة الشباب دغوغيا
ومشى وضرب سكرى وجا معربد خارج لحوال
شاف بعينه إيماه كتحضر مع لفقرا محزم بالكرزيا
تما هزوا حاله زاد لصف وصال وجال
وجبد شاقور وبالرشوق وبدا يضرب راسه وظن فاز بالمزيا
وبقى حتى ندمى وطاح وفني قبله ونحال
وهزوا لمقدم شم فيه السكرا ودوى وقال ليلة زغبيا
ما ضنينا هذي وليس خطرت لينا ف لبال
وبقى حمان ف دارهم معربد سكران بين لعباد شفيا
طايح مشبوح صريع فوق من صدره دمه سال
ومشات أمه والناس لعروسه جابوها من دارهم كالنتريا
وبنات المدرسه عل لعروسه ينشدوا بسجال
مهما دخلت لدار ولبنات معها خطبوا جميع بلفاظ قويا
ولبس حمان حوايجه معربد باقي غلغال
ودخل عل لعروسه لبيتها كيف قضى رب الشيات عالم لخفيا
بلحية والرزة مخبلة وجه زاد كحال
زاد لفراش وطاح كجمل وتمغط قدمها حالة سويا
بايت يشخر ويزيم كلوحش اليل وما طال
ومناين فاقت ف الصباح لقاته بايل ف لفراش وبقات دهيا
وبدات تعيط بالشرع غيثونا بارجال
ثم اجتمعوا جيرانهم ومشى لخبار لدراهم جاوا بلحميا
شدوا عن حمان لببيت سكران في غير حوال
خرجت لعروسه لحكام دارت عنه دعوا منظمه جنائيا
وحضر حمان وقر بين سكران راشق مازال
وحكم عن نفسه بطلاق قام وطلق طلقه مبينه شرعيا
وعل السكرة سجنوه تم شهرين عل لكمال
وبقى حمان كظيم في السجن متفرد وجميع ما خسر سار خطيا
وخسر ف الدعوا والزواج ولعرس وضاع لمال
هذي سيرة لخمر كيخلي مولاه عل الدوام ضحكا وشفيا
لين من هو سكران ما يفوق حرام من حلال
تم لعروسه يا فهيم تزوجت بعد العدا لواضحة الشرعيا
وخدات أستاذ بحالها بقدرة نعم لفعال
ما كنعرف حمان في زماني ولا يماه ولا عروسه عصريا
هدي إلا فرجه عملتها تعجب لعقال
واسمي محمد في النظام العيساوي الفلوس في اللغى غير كنيا
طالب ربي لعفو والستر والبركة ف لمال
الرئيسية
موضوع: قصيدة قصة حمان نظم : العيساوي الفلوس 
السبت 1 يناير - 16:39
