منتديات دواوين الثقافية و الأدبية

لون لغراب

صبغ لغراب ريشو
حاول يكتم نعيقو
فوق لرض بدل مشيتو
طار ف السما بحال لحمام
حمل ف منقارو غْصن زيتون
ودعا الناس للسلام
طار بعيد وما قدر يتعلى
ب لغصن ما عرف يتهنى
بان عيبك يا لغراب
هذيلك ما بقى ينتاق
شحال من غراب
لابس ريش حمام
اوتار حلقو زرياب
مربوع لقد لمسو مرطاب
دواخلو تبان نوار
تعطر الرحبة والدوار
والناس عليه زوار
ايه يا لغراب
شحال انت مسكين
ما راضي ب صيفتك
بزّز تحفر ثقبة الزين
ترسم لخالة ف جْبين
تخبي عيوبك عل لعين
بان عيبك يا لغراب
قلبك تعادى ب لونك
ساح فيه السواد
تضمر الشر وما تراعي جوار
تحضن ب جناح وتطعن لجواد
نعيقك ماتلم ما رحم
الناس منو شكات
على خبثو شحال دوات
عشك ما غوت فيه طير
ما كْلَ منو شعير
لاانت من اصحاب لخير
ولا مَاصحاب لخمير
با ن عيبك يا لغراب
من الناس خذيتي لجواب
لا تعجّب الى تسدّت
ف وجهك لبواب
حيت هذاك هو لحساب

نجاة احسايني 27/3/2014

تحياتي الصادقة أختي الفاضلة المبدعة نجاة احسايني على هذه الزجلية مزيدا من التألق والعطاء

سعيد محمودي كتب:: تحياتي الصادقة أختي الفاضلة المبدعة نجاة احسايني على هذه الزجلية مزيدا من التألق والعطاء

بصمتك جد مشجعة سيدي شكرا جزيلا على المتابعة